WUWÖT 8 - PIPÏLIA

¹ Kïlenchï ECHOTYON Musa, “Wïyö lenchinö Parao kölö ECHOTYON, ‘Nya kïpa piköchan atökïpöghisyeghwanïn.

² Wölo ato itaghenyi kïpa, otorchinan korengu mnyakaway.

³ Nyïghiti mnyakaway lalwa Nile ntökwitï kongu nko wölo irïwenyi nko pöröyengu nko kori mötworiku nko cho pö piköku nko nököghengu nko kariku cho ichïlisyeghonyi.

⁴ Komchininyi mnyakaway nko piköku nko mötworiku.’ ”

⁵ Kïlenchï ECHOTYON Musa, “Lenchinö Aron, ghïtenö lïkïngu ompö paraku lalwatïn nko champilwonoy nko takaray, atökïpka mnyakaway koro Misri!”

⁶ Kughïtö Aron lïkïnyi ompö pögho Misri. Kïpka mnyakaway akulum koro Misri.

⁷ Wölo kwigh chesoköytin lenyoni, kwipï mnyakaway koro Misri.

⁸ Kïkur Parao Musa nko Aron akïlenchï, “Asagha ECHOTYON kïchengenanïn nko piköchan mnyakawayichï. Atö opïstan pïchï kïpa kutö ECHOTYON amöros.”

⁹ Kïlenchï Musa Parao, “Ongörökan osowunyi nko mötworiku nko piköku, atökechengeninyi mnyakaway nko kongu kïpoto lalwa Nile onkït.”

¹⁰ Kuyokyï Parao lö, “Soghwanïn asïyech.” Kïlö Musa, “Nya kïlenyoni kemwaghanyi, atenkïtunö lö möminye chi nyo karkegh nko ECHOTYON Tororötïncha.

¹¹ Kïchengeninyi mnyakaway nko mötworiku nko piköku, kïpoto lalwa Nile onkït.”

¹² Kïweghö Musa nko Aron wölo mi Parao, atolapay kïsagh Musa ECHOTYON kïcheng mnyakaway, lenyini kakïchomnyechï nko Parao.

¹³ Kwigh ECHOTYON lenyini kitep Musa. Kïmeghö mnyakawayichay kimi korïn nko kiroröy nko wölnö le paren.

¹⁴ Kusupotö pipö Misri mnyakawayichay akutïkum. Kïngutö kore.

¹⁵ Wölo otini kisïwa Parao lö kimeghö mnyakaway, kwaghïghit mötïnyi amöterchïnye chane lenyini kimwa ECHOTYON. Rïmpö

Rïmpö

¹⁶ Kïlenchï ECHOTYON Musa, “Mwochinö Aron kughïtö lïkïnyi akulï terïtyon kïlïkwï rïmpö ompö koro Misri kïmïkul.”

¹⁷ Kwigh chane lenyoni. Kughïtö Aron lïkïnyi, akulï terïtyon kïlïkwï rïmpö ompö koro Misri kïmïkul. Kulum rïmpö pich nko tyonkïn.

¹⁸ Kumukyï chepsoköytin kwigh lenyoni akimemïcha. Wölo kilum rïmpö pich nko tyonkïn.

¹⁹ Kïlenyona kïlenchï chepsoköytinechay Parao, “Pö Tororöt owesyonï.” Kwaghïghit möt pö Parao amöterchïnye chane lenyini kimwa ECHOTYON. Sosogh

Sosogh

²⁰ Kïlenchï ECHOTYON Musa, “Inget asïyech tökwoghö aikany Parao ato wetöy nyinte lalwa aimwochï nyinte lö kölö ECHOTYON, ‘Nya kïpa piköchan, atökïpöghisyeghwanïn.

²¹ Ato mepïstenyinye chane kïpa, oyokunyi sosogh cho chang nko mötworiku nko piköku nko koriku. Nyïghiti sosogh kori pipö Misri nko ompö nyini le kore kïtangogh.

²² Wölo opïstenan koro Kosyen asisoni wölo möngöy piköchan, atömetïta sosogh wölini. Atenkïtunö lö ochan ECHOTYON nyo omitan nko pikachu.

²³ Kïlenyona otönan rotyot kwenu piköchan nko cheku. Igho kiporunötonï asïyech.’ ”

²⁴ Kwigh ECHOTYON lenyoni, kïpka sosogh cho chang kö pö Parao nko kori mötworichi nko koro Misri kïmïkul, kunyara kore ompö sosogh.

²⁵ Kïkur Parao Musa nko Aron akïlenchï, “Ape otönö Tororöt amöros ompö koronete.”

²⁶ Wölo kïlö Musa, “Melö karam keghacha lenyoni, ompöwölo kitönicha ECHOTYON Tororötïncha amöros nyo möchömöcha pipö Misri. Ato kitötecha amöros nyo melö chömöy chane, kïwirenecha koghïn.

²⁷ Mïchinecha kepe rutogh nyo pö osis sömök wölnö le surkwen atöketönö ECHOTYON Tororötïncha amöros lenyini kimwoghwecha.”

²⁸ Kïlö Parao, “Opïstenokwa ape otönö ECHOTYON Tororötïngwo amöros ompö surkwen. Mopetekwanye wölo low tya, wölo osoghwanïn tïkwïl.”

²⁹ Atolapay kïlö Musa, “Kangetan tawungu akï osoghan ECHOTYON atökïngeta sosogh asïyech wölo iminyi nko mötworichi nko pikachi. Wölo memïr put ngat itagh kïpa pich kutö ECHOTYON amöros.”

³⁰ Kïweghö Musa tawu Parao akïsagh ECHOTYON.

³¹ Kwigh ECHOTYON lenyini kitep Musa, kïchenga sosogh Parao nko mötworichi nko pikachi. Möminye ompö akong nyo kingötï.

³² Wölo kwaghïghit möt pö Parao ngat, amöchömchïnye pïchay kïpa. Megha kyak