WUWÖT 6 - PIPÏLIA

¹ Atolapay kïlenchï ECHOTYON Musa, “Isïwïyenyi kïgh nyo oghchinan Parao, atökïyon piköchan ompö owesyö kïwuwö korenyi.”

Kökur Tororöt Musa

² Kïlenchï Tororöt Musa, “Ochan ECHOTYON.

³ Kyongwïnchan Apraam nko Isak nko Yakopo le Tororöt Kimuktoghin, wölo moporchanye kegh chane ompö kaynenyan, ECHOTYON.

⁴ Kyaman muma* nko chane lö, otöninan koro Kanan, kor nyo kimöngöy chane le pïnot.

⁵ Kyalïman loko monïngo Israel cho mi koro Misri le sekey, ananan mumenyan.

⁶ Kïlenyona mwochinö pipö Israel lö, ‘Ochan ECHOTYON, akï omïtunenokwa sekeynön nyo omitekwa ompö koro Misri, osörunonekwa mötwornönenkwa. Anyörilan kong chane ompö owesyenyan asörwokwa.

⁷ Oghekwa alïkuna piköchan alïkwan Tororötïnkwa, tonkïtunökwa lö ochan ECHOTYON Tororötïnkwa nyo kyamïtunenekwa sekeynön ompö koro Misri.

⁸ Omïtokwa kor nyo kyawalwalan lö otönan Apraam nko Isak nko Yakopo. Ochan ECHOTYON.’ ”

⁹ Kïngölonchï Musa pipö Israel, wölo kimöterchïcha Musa, ompöwölo kitïng ngwonïn ompö mïkuliskökwa nyo pö sekeynönengwa.

¹⁰ Kïlenchï ECHOTYON Musa,

¹¹ “Wïyö mwochinö Parao pöytoghinto Misri kïpïstö pipö Israel kïwuwö koronï.”

¹² Wölo kïlenchï Musa ECHOTYON, “Möterwanïcha pipö Israel. Muköy lö ne Parao kïterwanïn? Ochan ngo nyu akwanyï aghïgh kutinyan?”

¹³ Kïlenchï ECHOTYON Musa nko Aron mwochinö pipö Israel nko Parao pöytoghinto Misri lö, “Keyokwecha ECHOTYON kentöghoghchinö pipö Israel kïwuwö koro Misri.”

Kiyitöto ka Musa nko Aron

¹⁴ Chï kï yetïntino kori papotïnekwa: werpö Rupen, poretya Israel: Anok nko Palu nko Esron nko Karmi choni kï kaporpa Rupen.

¹⁵ Werpö Simion kï: Yemuel nko Yamin nko Oad nko Yakin nko Soar nko Syaul mompö chepö pipö Kanan. Choni kï kaporpa Simion.

¹⁶ Chï kï werpö Lawi kïrïpata kegh nko pïntangwa: Kersyon nko Koat nko Merari. Kimang Lawi könyis 137.

¹⁷ Werpö Kersyon kï: Lipni nko Syimey, ompö korikwa.

¹⁸ Werpö Koat kï: Amram nko Isar nko Epron nko Usiel. Kimang Koat könyis 133.

¹⁹ Werpö Merari kï: Mali nko Musyi. Choni kï kaporpa Lawi nko monekwa.

²⁰ Kip Amram Yokeped sankenyi. Akïyichï Aron nko Musa. Kïmang Amram könyis 137.

²¹ Werpö Isar kï: Kora nko Nepek nko Sikri.

²² Werpö Usiel kï: Misyael nko Elsapan nko Sitri.

²³ Kip Aron Elisyepa, chepö Aminadap, chepto ompö Nasyon. Kïyichï Nadap nko Apiu nko Eleasar nko Itamar.

²⁴ Werpö Kora kï: Asir nko Elkana nko Apiyasap. Choni kï kaporpa Kora.

²⁵ Kip Eleasar wero Aron, akonga ompö tipö Putiyel akï yichï Pineas. Chï kï poyi kori papotïno pipö Lawi nko korikwa.

²⁶ Nyï kï Aron nko Musa chay kilenchï ECHOTYON, “Amïtuna pipö Israel löwïr kïwuwö koro Misri.”

²⁷ Chane chay kimwochï Parao pöytoghinto Misri paraku kimïtunata pipö Israel kïwuwö koro Misri.

Kömwochï ECHOTYON Musa nko Aron kïpa wölo mi Parao

²⁸ Otini kingölonchï ECHOTYON Musa ompö koro Misri,

²⁹ kïlenchï, “Ochan ECHOTYON. Mwochinö Parao pöytoghinto Misri ngal lapay cho omwowunyi.”

³⁰ Wölo kïlenchï Musa ECHOTYON, “Muköy Parao kïterwanïn lö ne akwanyï aghïgh kutinyan.”