WUWÖT 5 - PIPÏLIA

¹ Kïwö Musa nko Aron wölo mi Parao akïlenchï, “Kölö ECHOTYON, Tororöt pö Israel, ‘Nya kïpa piköchan, kwighwanïn ichon ompö surkwen.’ ”

² Kïlö Parao, “Ngo nyo le ECHOTYON, nyo omukan ater kutinyi apïstö pipö Israel kïpa? Monkïtönye ECHOTYON, amopïstonanye pipö Israel kïpa.”

³ Kïlö chane, “Keporwecha kegh Tororöt pö Eprania, kïsomechanyi pïstecha kepe rutogh nyo pö osis sömök wölnö le surkwen, atöketönöcha ECHOTYON Tororötïncha amöros, atömöparenecha sömew anta chok.”

⁴ Kïlenchï pöytoghinto Misri Musa nko Aron, “Ompö ne tomökekwa kïpïstö pïchï ighisyengwa? Nya kwigh pich ighisyengwa.

⁵ Ompöwölo kichangit pïchï ompö koronï omökekwa kumuny lö ne ompö ighisyewutkökwa?”

⁶ Kïlenchï asisoni Parao yetïntino pich nko kighyongteghikwa,

⁷ “Motönö ngat pich mopö cho igho mataparen, nya kïpa chane kïmar.

⁸ Tönö chane kwigh mataparen cho tenö chay keghöy osis, machïchuk kïgh ompö choni, ompöwölo kilïkwï soson pïchï. Nka nyete lochot lö opïstecha kepe ketönö amöros Tororötïnyo.

⁹ Otönö pïchï kwigh ighisyö nyo wow, atökïpïstö kïter ngala putintön.”

¹⁰ Kïpa sany yetïntinechay nko kighyongteghï akïlenchï pipö Israel, “Kölö Parao, ‘Mökekonokwanye mopö.

¹¹ Ape akwane amara wölo onyorchini. Amökichïchukönye ighisyenkwa.’ ”

¹² Kïtoyechï pïchay koronay kïmïkul pö Misri, kïyar mopö.

¹³ Kïköromöchitu kighyongteghichay akïlö, “Awanga ighisyengwo, nyo tenö nyay koghekwa ngat, atay kömito mopö.”

¹⁴ Kemuny, kighyongteghichay pö pipö Israel cho kikïl kighyongteghi Parao aketep lö, “Ompö ne tömawangakwa ighisyenkwa asete nyo pö mataparen le ato koghekwa osis.”

¹⁵ Kïpa kighyongteghi pipö Israel kïlokyï Parao akïlenchï, “Ompö ne teghchinönyi mötworiku le nyï?

¹⁶ Mömicha mopö cho kïkonecha akïlenchinecha, ‘Agha mataparen!’ Kakïmungecha wölo pö lelutye piköku.”

¹⁷ Wölo kïlö nyinte, “Ochikwa soson nyoman, nka nyï olentekwa pïswecha kepe ketönö amöros ECHOTYON.

¹⁸ Ape nyu, agha ighisyö akï mömicha mopö cho kïkonokwa, wölo oghekwa mataparen cho tenö chay pö osis.”

¹⁹ Kïsïwa kighyongteghi pipö Israel lö kitïng chane kömpölelyö, otini kikïmwochï lö, “Mochïchukekwanye mataparenikwa ompö chinö koghekwa osis.”

²⁰ Kuryam kighyongteghichay nko Musa nko Aron cho kiköngöy chane otini kipkono wölo mi Parao.

²¹ Akïlenchï chane, “Nya kïsïwa ECHOTYON akurwokwekwa, ompöwölo kaghechakwa keghachituna ompö tawu Parao nko mötworichi aghakwa nyinte kïnyorï kïgh nyo pörenecha.”

Köngwïrngwïronchï Musa ECHOTYON

²² Kïlenchï Musa ECHOTYON, “Echotyon, ompö ne teghchinönyi pïchï nyo gha? Akwompö ne teyoktaninyi?

²³ Ompöwölo kïngata otini kyangwïnan wölo mi Parao angalanan ompö kaynengu, kwighchï nyo gha pïchï, akïtomönye sörunönyi piköku nyonikïny.”