WUWÖT 34 - PIPÏLIA

¹ Kïlenchï ECHOTYON Musa, “Pata koghïn odeny cho töpölöl le chay kipö tagh, tokirchan ori ngalechay kimi chay kipö tagh kiwirtenyi kïghyösyö.

² Töpenö kïpsach asïyech atenyonö tökwoghö kutïng pö Sinay parak atenyoryenö nko ani.

³ Möminye chi nyo pusu kutïng nko nyi amekany kesöchï chi kutïngoni kïmïkul amekany kwaketa kyakï ato lekïto kutïngoni.”

⁴ Kupat Musa koghïn odeny cho töpölöl le chay pö tagh akïwö tökwoghö kutïng pö Sinay, lenyini kimwochï ECHOTYON nyinte akwip koghichay.

⁵ Kïrökunö ECHOTYON polta akughyongö atoni nko nyinte akïkur kaynenyi lö, ECHOTYON.

⁶ Kuwer ECHOTYON tawunyi akïmwa lö, “Ochan ECHOTYON, Tororöt nyo pö kisyonchin nko pöropchö, melö kwïskwïs kïnarek, tïng chomnyogh nyo wow nko nyo ghanate.

⁷ Syonchini cho chang akïlöstoghchini ghöyityengwa nko lelutkökwa nko ngokikwa amelö yityini chi nyo gha lö mötïnye ghöyityö, ghokyini monïng ghöyityeto papotïnekwa nko kukötinekwa löwïr, ntökwit pïnta nyo pö sömök nko nyo pö angwan.”

⁸ Kungïrukö Musa lawel ntökwit ngwïny akïsagh

⁹ lö, “Ato kechamanyi kïgh nyo kaghan, we Echotyon, osoghinyi lö, wïyö nko acha, kïrökegh kö pich cho oghïghe mötöwöy ailöstewecha ghöyityenyo nko ngokicho aichengecha kelïkuna piköku kegh.”

Kakirelit muma*

¹⁰ Kïlenchï ECHOTYON Musa, “Oman muma nko pipö Israel. Oghan töngönchin ompö tawungwa cho kitomöcha kwighisyö ompö ngwïny kïmïkul anta ompö punton anka tïkwïl akïsïwïyi pïchï omöngekwa kwenungwa ighisyo ECHOTYON, ompöwölo oghwokwa tïkwïn cho pö töngönchin.

¹¹ Irip kïgh nyo omwowunyi asete. Oyononan tawunkwa pipö Amori nko Kanan nko Ititi nko Peris nko Ipiti nko Yepusi.

¹² Orip kegh atömam mis nko pipö koronini opetekwa, atömölïkwï ngöghöp ompö kwenunkwa.

¹³ Ingany ato kïpelo amöros airul pchörinekwa aitör tororötinekwa Asyera.

¹⁴ “Mesagh tororöt anka tïkwïl, ompöwölo ochan ECHOTYON, Tororöt nyo le söstoghin ompö tororötin walaka.

¹⁵ Meam mis nko pipö korononi, atömapa pich kwigh cheporesnan nko tororötinekwa akutö ropöw akïkurinyi atyamanyi ropöwekwa

¹⁶ akensyechikwa werkökwo tipikwa, kïpa tipikwa kwigh chane kïrïp tororötinekwa.

¹⁷ “Moghchï kegh tororötin cho kitongöy.

¹⁸ “Irip Ichon pö Makatin cho puryö Mumar. Iyomenyi makatin cho puryö mumar, le ato kyomwowunyi ompö asis nyo kikekïl ompö arawa Apip, ompöwölo kyapkanekwa arawanoni koro Misri.

¹⁹ “Chichan tïkwïn löwïr cho le poretay cho melö sökot nko poretayi tïch nko cho pö kechir.

²⁰ Isörunonyi poretya sïkïryö wawa kech, wölo ato melö ichömenyi sörune iryan kat. Isörï poretayiku löwïr cho le wor. “Amelö ngwïnöy chi tawunyan nko mori kwïle.

²¹ “Ighenyi ighisyö osis mut nko akonga, wölo imungenyi asispa mut nko odeny, kö osiswo ngorsyö anta cho pö ilö.

²² “Irip Ichon pö Ilö otini ilenyi poretayi pagh nko Ichon pö Tunkun otini ipïtenyi akweku ompö sörömu köny.

²³ “Pkonöy werköku kïnyïl sömök ompö köny tawu ECHOTYON Tororöt pö Israel.

²⁴ Oyonan punton cho mi tawungu anateghan rotyotïnekwa. Möminye chi nyo chengöy korenkwa otini kapekwa tawu ECHOTYON Tororöt kïnyïl sömök ompö köny.

²⁵ “Motötö ropöwo kisön nko makatyan nyo mi mumar amepïstö amöros nyo pö Ichon pö Pasaka* ntökïyech.

²⁶ “Ipunyi poretayi pagheku köny anka tïkwïl Kö pö ECHOTYON Tororötïngu. “Meghogh wawa nyo tökïrerïyi.”

²⁷ Kïlenchï ECHOTYON Musa, “Kira ngalechï ompöwölo kyaman muma nko nyi nko Israel ompö ngalechï.”

²⁸ Kitöpö Musa wölini nko ECHOTYON ompö osis tömönut angwan nko nöngötuskökwa, kimamnye makatyan anta gha pögh. Kukirchï koghichay töpölöl ngalechay pö muma le kirurut taman.

Körökunö Musa kutïng pö Sinay

²⁹ Otini kirökunö Musa kutïng pö Sinay, kipu koghichay le odeny töpölöl pö kirurut. Kimenkïtnye nyinte lö kilïwï tokochunyi, ompöwölo kingalan nko Tororöt.

³⁰ Nyini kisïwa Aron nko pipö Israel lö, kilïwï tokochu Musa, kuwagh kïrich nyinte.

³¹ Wölo kïkur Musa chane, kungwïn Aron nko yetïntino tuyotïn wölo mi nyinte, kïngölonchï Musa chane.

³² Atolapay kïpka pipö Israel akïtuyö nko nyinte, kïmwochï Musa kirurut löwïr cho kimwochï ECHOTYON ompö kutïng pö Sinay.

³³ Otini kiwany Musa kïngalan nko chane kuyenö tokochunyi ananka,

³⁴ wölo otini kiwetöy Musa Ema nyo mi ECHOTYON* kïngölonöy tïkwïl, kïngwïs anankanay, ntökïtenö kungwïn sany. Atolapay kïmwochï pipö Israel ngala ECHOTYON.

³⁵ Kïsïwa pipö Israel tokochu Musa lö kilïwï, kuyenö Musa anankanay tokochunyi ntökïtenö kïwö kïngalan nko ECHOTYON ngat.