WUWÖT 33 - PIPÏLIA

¹ Kïlenchï ECHOTYON Musa, “Angetena yi nko pïchay kimïtunenyi koro Misri, ape koronay kyowolwolchan Apraam nko Isak nko Yakopo lö, ‘Otönan monekwa.’

² Oyontonan malaykayan kuntöghoghwokwa, ayonan pipö Kanan nko Amori nko Ititi nko Peris nko Ipiti nko Yepusi.

³ Opetekwa kor nyo chang chö akïwow kumata, wölo melö owetan nko akwa, atömawanyakwa, ompöwölo ochikwa pich cho oghïghe mötöwöy.”

⁴ Otini kilïm pïchay ngalechoni ghach, kilochö akimöminye chi nyo kilach karïn cho pïchighöch.

⁵ Ompöwölo kökilenchï ECHOTYON Musa, “Mwochinö pipö Israel lö, ‘Ato owan nko akwa ompö nyo tangogh owonyokwa, ompöwölo ochikwa pich cho oghïghe mötöwöy. Kïlenyona angwïsa karikwo atonkïtwan kïgh nyo oghwokwa.’ ”

⁶ Kïlenyona kïngwïs pipö Israel karikwa kïngata kutïng pö Sinay kutang tagh.

Ema nyo mi ECHOTYON*

⁷ Kicheng Musa Ema akïpörtochï sanypa möngot ato low ompö möngot akï kurö Ema nyo mi ECHOTYON. Chi anka tïkwïl nyo kötïng ngölyon nko ECHOTYON, kïwetöy Emanay.

⁸ Otini kiwetöy Musa kutöngöy Ema nyo mi ECHOTYON kingetyö pich löwïr akughyongö chi anka tïkwïl kuka emenyi akuros ntökïtenö kïlït Ema.

⁹ Otini kilït Musa Ema, kïrökwï pchöri polta akughyongö kuka Ema, kïngalan ECHOTYON nko Musa.

¹⁰ Nyini kisïwa pich löwïr pchöri polta kughyongö kuka Ema, kïnget chane löwïr akïsagh ompö kukoti emenikwa.

¹¹ Kingalan ECHOTYON nko Musa tokoch ompö tokoch le ato ngölonöy chi nko kongenyi. Otini kimïla Musa kutang möngot, kïtöpö Ema chumwaka nyo kïkuro Yoswö wero Nun nyo kile mötworinto Musa.

Keyomis ECHOTYON lö mi nyinte nko pikachi

¹² Kïlenchï Musa ECHOTYON, “Kemwowaninyi lö, ‘Mïta pïchï,’ wölo melö onkïtön lö, ngo nyo wetöy nko ani. Kemwaghanyi lö, ‘Onkïtön kaynengu, akenyorunyi tokoch nyo karam ompö tawunyan.’

¹³ Kïlenyona, ato konyorwan chömchin ompö tawungu osoghinyi lö, porwante ortïneku, tonkïtunyi atonyorwan chömchin ompö tawungu kïnomnyö. Ainan tïkwïl lö, cheku pïchï.”

¹⁴ Kïlö ECHOTYON, “Owetan nko nyi akoninyi rïntagh.”

¹⁵ Kïlö Musa, “Ato mewetenyinye nko acha, kïmelö kïngetocha yi.

¹⁶ Ompöwölo nkïtu pich lö ne lö, kechamaninyi nko piköku? Kïpoto ato iwenyi nko acha, atökesisitunacha nko pich walaka cho mi ngwïny.”

¹⁷ Kïlenchï ECHOTYON Musa, “Oghan kïyoni kemwaghanyi, ompöwölo kachaman kïgh nyo ighenyi kïtenö osis ankïtön lö ichinyi nyinyan.”

¹⁸ Kïlö Musa, “Osoghinyi lö porwante ororyengu.”

¹⁹ Kïlö ECHOTYON, “Oghan töroryenyan lapay kuwer tawungu amwatïtan kaynenyu ompö tawungu lö, ‘Ochan ECHOTYON.’ Olulan nyo kolul osyonchan nyo kosyonchï.

²⁰ Memukenyinye ntesïwanïn, ompöwölo melö sïwïyanïn chi tokoch akïsöp.

²¹ Mi kagh yi omitan nyo imukenyi ghyongenö parak.

²² Akï otini weröy töroryenyan otöninan körerutyo kagh, akartegheninyi ewunyu ntökïtenö aweran,

²³ anateghan nyu ewunyu atesïwenanyi patawunyan, wölo mörumunye tokochunyan.”