WUWÖT 29 - PIPÏLIA

¹ “Ikïlenyi chane le nyï kïlïkwï tïsï cho pöghisyeghwanïn, ichengenyi mogh nyo mïnïng nyo le kirïk nko mökol odeny cho lïpopöch

² nko makatin cho puryö mumar nko makatin cho mïnkech cho puryö mumar cho kakikulkulyö nko mwagh nko makatin cho töwörör cho kakitö mwagh. Ighonyi nkanun cho kinyöryö.

³ Ipunö löwïr köröp akonga aikat kïrkït nko mökolkö kwodeny cho pö amöros.

⁴ “Imïtunyi Aron nko werkachi kïpka kuka Ema nyo mi ECHOTYON* aimwata chane pögh.

⁵ Icheng sïrokö ailokyï Aron, koti nko sïra epod* nyo kogh nko epod nko sïra takat aikicha angwa mu nyo kikïnap nyo karam.

⁶ Ailokyï kopiyö mötïnyi nko aparparat nyo tïlil.

⁷ Aicheng mwaghay kiyiltoy aimïlchï mötïnyi aiyil nyinte.

⁸ “Atolapay imïtï werkachi ailokyï kotin chane

⁹ airötyï Aron nko werkachi angwa mu ailokyï kopiyen, atökïlïkwï nyingwa tïsintön kokay. Lenye nyoni wölo itörortonyi Aron nko werkachi tökïpöghisyewanïn.

¹⁰ “Ikötï kïrkït tawu kuka Ema nyo mi ECHOTYON* aikany kukana Aron nko werkachi morikwa mötito kirïk,

¹¹ atolapay ipörchï kïrkït tawu ECHOTYON ompö kuka Ema nyo mi ECHOTYON.

¹² Atolapay icheng kareranpa kisönko kirïk ainyïra kuyo ato kïpelo amöros, imïlchï chinö köngötï kitoröto ato kïpelo amöros.

¹³ Icheng siro mu nko koghogh wölo akwagh nko söromoykö kwodeny kïmi nko sunetkökwa aipela ato kïpelo amöros.

¹⁴ Wölo ipelonyi sany pö möngot panye cho pö kïrkït nko menyonte nko eghyante, ompöwölo kitötogh pö ngokï.

¹⁵ “Icheng makal akonga ompö chay aikany kukana Aron nko werkachi morikwa mötït,

¹⁶ atolapay iyeng makalu aicheng kisönkö aisö ato kïpelo amöros kuwitwit.

¹⁷ Atolapay itanatan makalu kïmïnkechitu aimwat mutïne nko kelye ainyoryö chinö mïnkech nko mötït

¹⁸ aipel makalu kïmïkul ompö ato kïpelo amöros pö ECHOTYON. Nguchinanïn nyu nyo karam.

¹⁹ “Icheng makalu nyinö anka aikany kukana Aron nko werkachi morikwa mötït,

²⁰ ipar makalu aicheng kisönkö kareran ainyïra walpa yit pö Aron nyo pö ewu tagh nko walisayi yiti werkachi cho pö ewuno tagh nko walisayi morichi cho echön cho pö ewuno tagh nko walisayi mori kelyön cho echön aisö kisönkö cho köngötï ato kïpelo amöros kuwitwit.

²¹ Icheng kareranpa kisönchay mi ato kïpelo amöros nko mwaghay kiyiltoy aisö Aron nko werkachi nko sïrokökwa atökïtïlilitu chane nko sïrokökwa.

²² “Ichengenyi sunetko makal nko tore nko siro mu nko koghoghtö wölo akwagh nko söromoykö kwodeny kïmi nko sunetkökwa nko kïpes nyo pö ewu tagh, ompöwölo makal nyo pö kitororöt.

²³ Aichengunö köröponay mi tawunyan makatyan akonga nyo kikiyila mwaghpa orolwö nko makatyante anka nyo möminye mwagh nko anka nyo tawarar.

²⁴ Itönenyi chï lapay ewuno Aron nko ewuneko werkachi aiwiswis kïlïkwï amöros nyo kiwiswisöy ompö tawu ECHOTYON.

²⁵ Atolapay ichengunö ewunekwa aipel ompö ato kïpelo amöros nko kitötoghtinechay. Nguchinanïn nyu nyo karam. Nyoni kï ropöwon nyo pö ma ompö ani.

²⁶ “Ichengenyi takat nyo pö kechanay pö kitororöt nyo pö Aron aiwiswis kïlïkwï ropöw ompö tawu ECHOTYON akïlïku nyoni karerantangu.

²⁷ “Ikïlenyi take nyo pö kitötogh nyo kiwiswisöy nko kïpestö nyo pöyitu tïsï ompö makalu kitororöt, ompöwölo pö Aron nko werkachi.

²⁸ Lïku nyete kareran nyo töni pipö Israel Aron nko werkachi kïnomnyö, ompöwölo kareran nyo töni pipö Israel tïsï ompö ropöwontengwa nyo pö pöghisyo ompö ECHOTYON.

²⁹ “Pöyitu sïrochay tïlilöch werpö Aron ato rapas nyinte, ato kiyil chane kïlïkwï tïsï.

³⁰ Loköy werïnyi nyo lïku tïsin ompö otini kömi nyinte ompö osis mut nko odeny, otini ngwïnöy kïpöghisïyi ompö Ema nyo mi ECHOTYON ompö Wölo Tïlil.

³¹ “Ichengenyi makalu kitororöt aighogh panye ompö wölo tïlil.

³² Omöy Aron nko werkachi panyeko makal nko makatyante nyay köngötï köröp, ompö kuka Ema nyo mi ECHOTYON.

³³ Omöy chane tïkuchay kikigha amöros pö kalya aketöror kikïkïl chane, wölo melö omöy chi nyo melö tïsin, ompöwölo tïlilöch.

³⁴ Ato ngötï pempö kitororöt anta makatyante nko asïyech, ipela ma, melö kyomöy ompöwölo tïlilöch.

³⁵ “Ighchï Aron nko werkachi kïrïp kegh nko chini komwowunyi, itïlilenyi chane osis mut nko odeny.

³⁶ Itötonyi kirïk kïtenö osis nyo pö ropöwo ngokï ompö kinyoryogh nko nyo pö ato kïpelo amöros ato ighenyi kinyoryogh tïkwïl aiyil atekïla.

³⁷ Ighenyi kinyoryogh ompö osis mut nko odeny nyo pö ato kïpelo amöros. Melö swongöy chi anta kïgh anka tïkwïl nyo melö tïlil.

Ropöw cho pö osis

³⁸ “Iroptonyi wara kechir odeny cho pö köny akonga ompö ato kïpelo amöros kïtenö osis.

³⁹ Iroptonyi waweto kech akonga tökwoghö, iropta anka mönon.

⁴⁰ Iroptonyi kilö akonga nyo pö pïsya cho kakikulkulyö nko lita akonga nyo pö mwaghpa orolwö nko lita akonga nyo pö dipay* nko waweto kech nyay pö tagh.

⁴¹ Airopta waweto kech nyinö anka mönon lenyoni. Nguchinanïn nyu nyo karam ropöwo pagh.

⁴² Lïku ropöwon nyo kïpelöy nyo pö kokay ompö kuka Ema nyo mi ECHOTYON, wölo onyoryeghonan angalanan nko akwa.

⁴³ Onyoryeghonan atoni nko pipö Israel akutïlilöy ororyenyan atoni.

⁴⁴ Otïlilan Ema nyo mi ECHOTYON nko ato kïpelo amöros akïlan Aron nko werkachi atökïpöghisyeghwanïn le tïsï.

⁴⁵ Otöponan kwenu pipö Israel alïkunan Tororötïngwa.

⁴⁶ Akunkïtu chane lö ochan ECHOTYON Tororötïngwa nyo kyamïtuna chane koro Misri atotöpan kwenungwa. Ochan ECHOTYON Tororötïngwa.