WUWÖT 28 - PIPÏLIA

¹ “Mïtuna werïnkwa Aron nko werkachi Nadap nko Apiu nko Eleasar nko Itamar ompö kwenu pipö Israel, atökïpöghisyeghwanïn le tïsï.

² Inöpchinenyi werïnkwa Aron sïro cho tïlilöch cho pö konyït nko pïchighyö.

³ Ingölonchinenyi pich cho tïng kimukat cho kyanyïghitan ngöghomnyö atökïnöpchï Aron sïro akutïlil nyinte kïpöghisyeghwanïn ompö ighisyo tïsintön.

⁴ Nöpöy chane sïrochï: kalacha nyo ngïru takat nko epod* nko sïra nyo kogh nko koti nyo karam nko sïra möt nko angwa mu. Nöpchini chane werïnkwa Aron sïro cho tïlilöch nko werkachi atökïpöghisyeghwanïn le tïsï.

⁵ Pöghisyegho chane puto kech cho orusöch nko nyo lata akwa lamay nko nyo pïrir nko koltin nko sïra katani nyo karam.

⁶ “Ighöy chane epod nyo pö tasim pö koltin nko cho orusöch nko cho lata akwa lamay nko cho pïröch nko sïra katani nyo kikïnanagh akenap nyo karam.

⁷ Tïngeto chane kalachis odeny cho lumöy löyos cho kinam kegh söremwokökwa, atökenyoryö tïkwïl.

⁸ Nko angwa mu nyo kikïnap nyo karam nyo kïrotïtoy nyo kikituyö nko epod akïkarkegh tïku cho kikigha.

⁹ Icheng koghïn odeny cho nyörilöch aikirchï kaynötut pö werpö Yakopo,

¹⁰ ikirchï mut nko akonga kagh akonga aikirchï kaynötutkö chinö köngötï kada nyinö anka kïrïp kegh nko ortïnekwa.

¹¹ Kïla chi nyo nkït kukiröy koghïn aikany kukir kaynötut pö werpö Yakopo. Aitö koghichoni kughyongö koltin cho kikïtök.

¹² Itönenyi koghichoni paraku kalachanay pö epod, atökïlïkwï koghi kinonut ompö ortïna Israel. Ipöy nyu Aron kaynötutkökwa tawu ECHOTYON ompö löyoswechi atökïlïkwï kinonut.

¹³ Itök koltin

¹⁴ ainagh sïrïmtin odeny cho pö koltin cho pïchighöch atolapay inyoryö sïrïmtine nko koltine.

Sïra takat

¹⁵ “Inöpchinenyi sïra takat nyo pö kirwok, ompö ighisyo nöpin nyo karam, inöpenyi le napata epod, akïkarkegh tïku cho kikigha.

¹⁶ Kongityot woptine kwangwan akikïnyakïm kïnyïl odeny, sentimiten 22 koghïntö nko töpesïntö.

¹⁷ Itötenyi tötut angwan cho pö koghïn, tötut nyo pö tagh kï: sardiyo nko topas nko karpunkïl.

¹⁸ Nyo pö odeny kï: emerald nko sapire nko dayemon.

¹⁹ Nyo pö sömök kï: chasinto nko akate nko ametist.

²⁰ Nyo pö angwan kï: peril nko oniks nko chaspa. Aitö koghichoni kughyongö koltin cho kikïtök.

²¹ Lïku koghi taman nko odeny kïrïp kegh nko kaynötut pö werpö Yakopo, kagh akonga ompö kaynata chi akonga, ompö ortïne kï taman nko odeny.

²² Inöpchinenyi sïra takat sïrïmtin cho kikïnanagh le pörköy cho pö koltin cho pïchighöch.

²³ Ighenyi kaymoris odeny cho pö koltin cho pö sïra takat aitö kaymoriska woptine kwodeny.

²⁴ Irötinenyi pörköyichay le odeny kikïnanagh ori kaymoris.

²⁵ Inyoryonyi söremwokö kwodeny ompö pörköyichay nko koltinechay kikïtök ainyoryö ompö okumpö tagh kalachanay pö löyos pö epod.

²⁶ Igh kaymoris odeny cho pö koltin aitö söremwok odeny cho pö sïra takat ompö sörömunyi nyo mi okumpö epod ori.

²⁷ Igh kaymoris cho pö koltin aitö sïrochay le odeny pö epod okumpö ngwïny wölo le tagh, ato lekïto rötutyenyi, paraku angwa nyo pö epod nyo kikïnap nyo karam.

²⁸ Irata tasim nyo orus sïra takat kïnam kegh kaymoriskachi nko cho pö epod, atökïtöpö paraku angwanay pö epod kikïnap nyo karam, atömöchagh kegh sïranay pö takat nko epod.

²⁹ “Sïtöy Aron kaynötut pö ortïna Israel ompö sïra takat nyo pö kirwok ompö takatunyi, otini wetöy Wölo Tïlil, atökwip chane tawu ECHOTYON ompö kinonut nyo pö chik.

³⁰ Itö Urim nko Tumim* sïranay pö takat pö kirwok, atökïmito takatu Aron otini wetöy tawu ECHOTYON, kïlenyona, sïtöy Aron chik kirwoko pipö Israel ompö takatunyi ompö tawu ECHOTYON.

Sïro walaka cho pö tïsin

³¹ “Inöpenyi sïro pö epod cho orusöch löwïr.

³² Tïngeto wölo lïtöy möt ompö kwen nyo kikinipnip kuwitwit le punpun nyo pö kalacha, atömöpala.

³³ Inöpchinenyi sïre okumpö kel makumanka* cho orusöch nko cho lata akwa lamay nko cho pïröch, kuwitwit nko kwïrkwïris pö koltin cho mi kwen.

³⁴ Aitö sïre kel kwïrkwïris pö koltin nko makomanken cho sisinchö muntinekwa.

³⁵ Lokotoy Aron otini pöghisïyi akelïmöy chöghötengwa otini lïtöy Aron Wölo Tïlil tawu ECHOTYON nko otini ngwïnöy sany atömöma.

³⁶ “Itang aparparatpa koltin cho pïchighöch aikir parakunyi lö, ‘Nyo Tïlil ompö ECHOTYON.’

³⁷ Irötyï aparparatnoni kopiyö ompö pörköyö nyo orus okumpö tokoch.

³⁸ Loköy Aron ompö tokochunyi atachaman amörostinekwa kïrkegh kömi lelut cho kegh chane.

³⁹ “Inap sïra nko kopiyö nyo pö katani nyo pïchigh nko angwa nyo kikïnap nyo karam akesïl.

⁴⁰ “Inöpchinenyi werpö Aron sïro nko angwo pö sïro nko kopiyen cho pö konyït nko pïchighyö.

⁴¹ Ailokyï sïrochï werïnkwa Aron nko werkachi aiyil aitöror aikïl atökïpöghisyeghwanïn chane le tïsï.

⁴² Inöpchinenyi chane sïrwalis cho pö katani atökïkarta chïrutyengwa, kïngata kapkörmön ntökwit kïpesöy.

⁴³ Akuloköy Aron nko werkachi otini petöy Ema nyo mi ECHOTYON* anta otini petöy ato lekïto ato kïpelo amöros atökïpöghisyö ompö Wölay Tïlil, atömepchï kegh ghöyityö akïmeghö. Lïku nyete kirurut nyo pö kokay ompö nyinte nko monechi.