WUWÖT 22 - PIPÏLIA

¹ “Ato chor chi egh anta kech akïyeng anta alta, kïghoktoy tïch mut ompö eghoni nko kechir angwan ompö kechanoni. Mïchini kïghakta löwïr, wölo atomötïngnye kïgh, kyalta nyinte ompö chini kachor.

^2-4 Ato kïnyorchï nyinte kïyoni kachor tökïsöpöy ato kö egh anta sïkïryö anta kech, kïmïchini kïghakta kïnyïl odeny. “Ato kïnyorï chorin wiröy kö akemuny kïma, kïmöminye lelutyö ompö mïltagh pö kisönkachi. Ato igha kipusï asis kïtïng pörin lelut ompö mïltagh pö kisön.

⁵ “Ato yakwïy chi kyakichi paren anta para sapipun akïpïstö kwam para chi anka, kïmïchini kwighta paghechï cho karamach ompö parenyi anta para sapipun.

⁶ “Ato nagh chi ma akïtas tagh kïpel wuw pö kato ntökïpel pagh cho mi putin anta pare kïmïkul, kïmïchini kwigh chichini ketor kunagh mat.

⁷ “Ato tö chi pöröryenyi ropïyen anta tïkwïn kïrorchï akechora koto pöröryenyi, ato kïnam chorinte kïghoku kïnyïl odeny.

⁸ Wölo ato mönyorïnye chi chorinte, kungwïn chito kot wölo kïsogho, atökuwalwal lö melö nyinte nyo kicheng tïkuchoni.

⁹ “Ato moyö pich egh anta sïkïryö anta kech anta sïra anta kïgh anka tïkwïl nyo kepot nyo mwoghöy chitö anka lö, ‘Nyinyan,’ petöy nyu pïchoni kwodeny wölo kïsogho. Chi nyo keporï Tororöt lö kalel, kïghokini pöröryenyi kïnyïl odeny.

¹⁰ “Ato mönokyï chi pöröryenyi sïkïryö anta egh anta kech anta kïgh anka tïkwïl nyo sapul kuyakwïy akïma anta tongwï anta kïcheng amöminye chi nyo kasïwa,

¹¹ kwomöy chane muma kwodeny ompö tawu ECHOTYON lö melö kacheng pöröryenyi kito chitö nyinö anka. Mïchini kïcham chito kïpö lenyoni amöminye ghoksyö nyo kïmököy.

¹² Wölo ato kikïchora chichoni, kïmïchini kïghokyï chito kïpö.

¹³ Kïnyïl ato kam tyony, kwipu ngötunönkö kïlïkwï söwintön amöminye kïgh nyo kïmöko nyinte kïghakta.

¹⁴ “Ato som chi kïgh nyo sapul pöröryenyi akutongwï anta ma amöminye chito kïpö atoni, kïmïchini kïghakta.

¹⁵ Wölo ato mi chito kïpö atoni, kïmöghoktonye chichoni kisom. Wölo ato kimi kerpes cho kikitötö ompö kïyoni sapul, kwighöy ropïyenichoni.

¹⁶ “Ato wal chi chepkïltït nyo tomönye kelotokïn akïrï tïkwïl, kutötoy kantin atökïlïkwï korkenyi.

¹⁷ Ato tagh kwanta kuyilchï nyinte, kïmïchini kutötö kantin cho pö chepkïltït.

Lelut cho ghach

¹⁸ “Mopïsyï korka nyo le ponin kïsöp.

¹⁹ “Kïtïghöy kïma chi nyo tökölonchini tyonkïn.

²⁰ “Chi nyo töni amöros tororöt anka nyo melö ECHOTYON kepöröy.

Pich cho mötïngcha owesyö

²¹ “Moghchï nyo gha ton anta arey nyinte, ompöwölo kyochikwa to ompö koro Misri.

²² Machop kong mïsïk anta panan.

²³ Ato achopakwa kong akïlokyanïn, oteran lokekwa lawel.

²⁴ Onörekan tya aparakwa. Lïku korukwa mïsïktin akïlïku monekwa pönon.

²⁵ “Ato ipösönchï kerpes chi nyo le nyinyan akï meywon ompö kwenunkwa, makarkegh nko pich cho le pösöntoghï cho ghoköy tösöw.

²⁶ Ato osomökwa sïra pöröryengwo alekwa kiyoku, oyokyï kïtomö kïröytö asis,

²⁷ ompöwölo sïranoni onkït nyo rïwegho, yeno ne kegh nyu? Ato lokyanïn nyinte, oteran ompöwölo otïngetan kisyonöt.

Konyït ompö Tororöt

²⁸ “Moswom Tororöt anta ochïp kintöghoghinteto pikökwo.

²⁹ “Moropï okonï kitötogh pö paghekwa nko chongïn pö dipay* nko cho pö mwaghpa arol. “Okonanïkwa poretayikwo cho le wor.

³⁰ Agh lenyoni tïkwïl ompö twakwo nko kechiryekwo. Nya kïtïpï nko kamati ompö osis mut nko odeny, wölo okonanïn ompö asispa mut nko sömök.

³¹ “Olïkukwa piköchan kegh. Kïlenyona mam peny nyo pö kïgh nyo kam tyompö wuw, owirchï kukïdin.