WUWÖT 20 - PIPÏLIA

¹ Kingalan Tororöt ngalechï löwïr lö,

² “Ochan ECHOTYON Tororötïnkwa, nyo kyamïtunekwa koro Misri wölo kyochikwa sekey.”

³ “Mesagh tororötin walaka kïpoto ani.

⁴ “Meghchï kegh körkeyïn pö kïgh anka tïkwïl nyo kipötöy nyo mi yïm anta ngwïny anta nyo mi pögh cho mi ngwïny ori.

⁵ Mesagh tïkuchoni anta ipöghisyechï, ompöwölo ochan ECHOTYON Tororötïngu nyo le söstoghin ompö tororötin walaka. Otökonan monïng ghöyïntino papotïnekwa pïnta nyo pö sömök nko nyo pö angwan, chona reyanïn.

⁶ Wölo osyonchinan pich cho makïrar cho chömanïn, akïripöy kirurutköchan.

⁷ “Mekur kaynata ECHOTYON Tororötïngu kwïle, ompöwölo yityini ECHOTYON ngokï chi nyo kuröy kaynatenyi kwïle.

⁸ “Inan asispa Sapato* aitïlil.

⁹ Ighenyi ighisyewutköku löwïr osis mut nko akonga,

¹⁰ wölo lïku asispa mut nko odeny Sapato pö ECHOTYON Tororötïngu. Kïlenyona megh ighisyö anka tïkwïl asisoni: nyi anta werïngu anta cheptöngu anta mötworintengu anta kyakiku anta ton nyo mi katangu.

¹¹ Ompöwölo kigh ECHOTYON yïm nko ngwïny nko nanam nko tïkwïn löwïr cho mi oringwa ompö osis mut nko akonga, atolapay kumuny ompö asispa mut nko odeny akusoyön asispa Sapato akutïlil.

¹² “Ikonyït papongu nko yongu, atökïchangit osisweku ompö kor nyo koninyi ECHOTYON Tororötïngu.

¹³ “Mepar chi.

¹⁴ “Megh cheporesnan.

¹⁵ “Mechorsyö.

¹⁶ “Mesöwintönchï pöröryengu putintön.

¹⁷ “Mepïrchï koto pöröryengu anta korkenyi anta mötworintenyi anta edanyi anta kyakichi anta kïgh anka tïkwïl nyo tïng nyinte.”

Kömïghyö pich

¹⁸ Nyini kilïm pich tïlöt nko chöghöto kontï akïsïwa kiryalat nko kutïng nyo ighönöy, kipotonchö pich akïmïghyö. Kïtïpïyö ato low.

¹⁹ Akïlenchï chane Musa, “Ngölonwecha nyo le nyi kïterecha. Wölo mekany kïngölonwecha Tororöt atömökïmeghecha.”

²⁰ Kïlenchï Musa pïchay, “Mowöghisyö, kengwïn Tororöt kïtyamakwa, atawaghakwa nyinte atömaghakwa ngokï.”

²¹ Kïtïpïyö pich wölo low, kïwö Musa kïrich poltonay kimi Tororöt.

Kirurut cho pö ato kïpelo amöros

²² Kïlenchï ECHOTYON Musa, “Mwochinö pipö Israel lö, ‘Kasïwekwa akwane lö kongölonwokwa ompö yïm.

²³ Moghchï kegh tororötin walaka cho pö silpa anta koltin atastanïn.

²⁴ Otekwanïn ompö nyïngwïtyan ato kïpelo amöros aikonï amörostinekwa cho kïpelöy nko cho pö pöghisyö cho pö kechiryekwa nko twakwa. Ompö wop anka tïkwïl wölo kaghan kesaghenanïn ongwïnchinokwa nyu operurokwa.

²⁵ Ato otekwanïkwa ato kïpelo amöros nyo pö koghïn, mateka koghïn cho kakipat, ompöwölo osïmnyonekwa ato opöghisyeghekwa karikwa.

²⁶ Malang ato kïpelo amörostönyan ompö lontöwon, atömörumï chïrutnönenkwa ompö ori.’