WUWÖT 2 - PIPÏLIA

¹ Kiwö chi akong nyo pö ara Lawi kwip chepö pipö Lawi.

² Kïmir kokonay akïyï weri. Otini kisïwa lö monïng nyo karam, kïwïny ompö aro sömök.

³ Akï otini kimökumukönye kïwïny ngat kïnöpchï tirïpka nyo mïnïng nyo pö awawat. Akïmala tömönchö akutö monïngay ori akïwïnchï kwenu sus cho mi kamasu lalwa.

⁴ Kughyongö cheptöngwa ato low kite, ompöwölo kimököy kunkïtu lö ne nyo igho ompö nyinte.

⁵ Kungwïn chepö Parao atökuwun kegh ompö lalwa. Kimi mötworichi kïpestoy ompö sörömu lalwa. Kïsïwa nyinte tirïpkanay mi kwenu sus kïyonta mötworintenyi kïwö kïchengwï.

⁶ Otini kiyat kïsïwa monïngay kimi kïloköy, kusyonchï akïlö, “Nyï kï akonga nyo pö monïngo Eprania.”

⁷ Kïlenchï chepto ompö monïngay chepö Parao, “Owan okurunyi akonga ompö koru Eprania kïnömunyi montö?”

⁸ Kïlenchï chepay pö Parao nyinte, “Wïyö ye.” Kïwö chepay kïkurï kameto monïngay.

⁹ Kïlenchï chepö Parao kokonay, “Sïtö monïngï ainömwanïn okoninyi ropïyen cho pö ighisyengu.” Kwip kokonay monïngay akïwö kïnam.

¹⁰ Otini kïyetï monïngay, kïsïtyï kokonay chepö Parao kïlïkwï montanyi. Kïkurö nyinte Musa akïlö, “Ompöwölo kyangwïsunan nyinte pögh ori.”

Keperta Musa kïwö Midyan

¹¹ Otini kiyetï Musa, kïwö wölo mi pikökwa. Kïsïwa wölo kikichoptoy kong chane. Kïsïwa chi pö Misri kulïwöy chi pö Eprania nyo le nyingwa.

¹² Kura wölnö nko wölnö otini kisïwa lö kimöminye chi. Kïpar chichay pö Misri akïtïpchï ngoyomwö.

¹³ Nyini kiwö Musa asisto odeny, kïsïwa pipö Eprania odeny cho kïporyot. Kïlenchï Musa nyinö kalel, “Ompö ne telïwenyi werïngwo?”

¹⁴ Kuyokyï lö, “Ngo nyo keghinyi lïkuna yetïntöncha nko kirwokintencha? Imökenyi paranïn so le atay keparanyi chi pö Misri?” Kïmïgh Musa akïlö, “Nyoman kikenkïtï kïyay kaghan.”

¹⁵ Otini kinkïtï Parao kïmach kïpar Musa. Wölo kuperta Musa akïwö kitöpö koro Midyan. Akumpur kö pö pögh kamas.

¹⁶ Kimi tïsinto Midyan nyo kitïng tipichi mut nko odeny. Kïpka chane kïrömchï kyakikwa pögh. Otini kitökïrömchini pögh,

¹⁷ kïpka mösöwö walaka kïyon chane. Wölo kïnget Musa akungarak tipichay kïrömchï pögh kyakikwa.

¹⁸ Nyini kit kaw kïtep papongwa Reuel lö, “Ompö ne tapkanakwa asete lawel?”

¹⁹ Kïlö chane, “Kengarakecha chi pö Misri ompö mösöwechay akïrömwecha pögh akughegh kyaki.”

²⁰ Kïlenchï Yetro tipichi, “Akïmi onö chichoni? Ompö ne topïstenökwa nyinte? Okurunö kwomisyö nko acha.”

²¹ Kïcham Musa kïmang wöloni, kuyilchï Yetro Musa cheptanyi Sipora.

²² Kïyï kokonay worö, kïkurö Musa kaynenyi Kersyom, ompöwölo kilö, “Kalïkwan pïnotyon ompö koro pich walaka.”

²³ Nyini kiwer osiswö cho chang kïma pöytoghintonay pö Misri. Kïsïch ngwonïn pipö Israel ompö mötwornönengwa akïlokyö kïmach kingörokut, kïlïm Tororöt lokekwa

²⁴ akunan mumenyi nyo kyam nko Apraam nko Isak nko Yakopo.

²⁵ Kuros Tororöt pipö Israel akïsïwa kömpölelyengwa.