WUWÖT 17 - PIPÏLIA

¹ Kïpegha pipö Israel surkwen pö Sin lenyini kimwochï ECHOTYON akïmang Repidim. Wölo kimömicha pögh cho kigheghöy chane.

² Kïsyal nko Musa akïlenchï, “Konecha pögh keghegha.” Kïlenchï Musa, “Ompö ne tongwïrngwïronchanïkwa? Akwompö ne totyömekwa ECHOTYON?”

³ Kyam pich maral ompö atoni. Kïngwïrngwïronchï Musa akïlö, “Ompö ne temïtunenechanyi Misri ateparecha nko monecha nko kyakicha ompö maral?”

⁴ Kïrirchï Musa ECHOTYON lö, “Oghan ne ompö pïchï? Kamach kïwirenanïn koghïn.”

⁵ Kïlenchï ECHOTYON Musa, “Wïyö tawu pich aiwö nko poyi Israel ainamata lïkïyay kilïwenyi lalwa Nile.

⁶ Oghyongenan tawungu ompö ghatya Sinay atolapay Ilïw ghatye, pkono nyu pögh cho gheghöy pich.” Kwigh Musa lenyoni ompö tawu poyi Israel.

⁷ Kïkurö atoni Masa nko Meripa, ompöwölo kingwïrngwïronchö pipö Israel akïtyam ECHOTYON lö, “Ekïmito ECHOTYON nko acha nya anta ewo.”

Poryot nko pipö Amalek

⁸ Kupokyï pipö Amalek pipö Israel ompö Repidim.

⁹ Kïlenchï Musa Yoswö, “Kïla mïrön cho pö okuntönyo kïpa kïporyeghö pipö Amalek. Oghyongenan asïyech kutïng parak nko lïpö Tororöt nyo mi ewunechan.”

¹⁰ Kïporyeghö Yoswö pipö Amalek lenyini kimwochï Musa, kïwö Musa nko Aron nko Ur kutang kutïng parak.

¹¹ Kïtenö otini kisyol Musa ewunechi parak, kïrïnta pipö Israel, wölo nyini kerekunö ewunechi, kïrïnta pipö Amalek pipö Israel.

¹² Otini kyoghochö mori Musa, kïcheng chane kagh akutö nyinte kïtöpö. Kïtigh Aron nko Ur ewunechi, anka ewu tagh anka ewu löt, atökïghïtö ewunechi ntökïröytö asis.

¹³ Kïrïnta Yoswö pipö lïk cho pö pipö Amalek.

¹⁴ Kïlenchï ECHOTYON Musa, “Kirchinö ngalechï kitapï atökïlïkwï cho kinonöy aikany kïlïm Yoswö, ompöwölo owongan pipö Amalek ompö ngwïny.”

¹⁵ Kïtek Musa ato kïpelo amöros akïkurö kaynenyi, “ECHOTYON kï Penterenyan.”

¹⁶ Kïlö, “Osyolö pentera ECHOTYON, ompöwölo poryegho ECHOTYON pipö Amalek kokay.”