WUWÖT 13 - PIPÏLIA

¹ Kïlenchï ECHOTYON Musa,

² “Otïlilwanïn poretay löwïr cho pö pipö Israel nko cho pö kyak.”

Ichon pö Makatin cho puryö Mumar

³ Kïlenchï Musa pich, “Anan asisï kyapkanekwa Misri, ompö kö pö sekeynön, ompöwölo kyapkanekwa korononi ompö owesyo ECHOTYON. Möminye makatyanta nyo kyomöy nyo kakitö mumar.

⁴ Ongetokwa koronï ye arawanï pö Apip.*

⁵ Orip ichonï ompö arawanï otini kemïtokwa ECHOTYON ntat koro pipö Kanan nko Ititi nko Amori nko Ipiti nko Yepusi nyo kiwolwolchï papotïnekwa lö konokwa, kor nyo chang chö akïwow kumata.

⁶ Omekwa makatin cho puryö mumar ompö osis mut nko odeny akïmito ichon nyo pö ECHOTYON ompö asispa mut nko odeny.

⁷ Kyomöy makatyan nyo puryö mumar ompö osis mut nko odeny. Möminye makatyanta nyo mi mumar nyo kïsöchinokwa, makany kesöchï mumar korengwo.

⁸ Otini ketor olenchï monekwo, ‘Kighecha le nyete, ompöwölo kimïtunenecha ECHOTYON koro Misri.’

⁹ Lïku nyoni kinonut ompö akwa le kïgh nyo kakïrötyï ewunekwa anta tokochwekwa. Nonwekwa oripö kirurut pö ECHOTYON ompöwölo kimïtunenokwa nyinte koro Misri ompö owesyenyi nyo wow.

¹⁰ Orip ichonï ompö asistanyi nyo kikekïl ompö köny anka tïkwïl.

Poretay

¹¹ “Otini kemïtekwa ECHOTYON ntat koro Kanan, lenyini kiwolwolwokwa nko papotïnekwa lö, okonokwa,

¹² otïlilchinekwa ECHOTYON poretay löwïr. Twatan löwïr cho pö twaku cho le kiru kïpö ECHOTYON.

¹³ Iyolonenyi twatan nyo pö sïkïryö wawa kech akï ato mealanyinye iryan kat. Iolenyi poret anka tïkwïl ompö kwenu moneku.

¹⁴ Ato tepinyi montöngu ompö osis cho pkonöy lö, ‘Poru ne nyï?’ Ilenchï nyinte, ‘Kimïtunenecha ECHOTYON Misri koro sekeynön ompö owesyenyi.

¹⁵ Otini kitagh Parao ompö oghïghyeto mötïnyi kepecha, kïpar ECHOTYON poretay löwïr ompö koro Misri, poretayi pich nko cho pö kyak. Kïlenyona oghchinan amöros ECHOTYON ompö poretay löwïr cho le kiru cho pö kyak, wölo olan poretay cho pö werköchan.

¹⁶ Lïku nyoni kinanat ompö akwa le kïgh nyo kakïrötyï ewunekwa anta tokochwekwa. Nonwekwa lö, kimïtunenokwa ECHOTYON koro Misri ompö owesyenyi nyo wow.’ ”

Pchöri polta nko pchöri ma

¹⁷ Nyini kipïstö Parao pïchay kïpa, melö kimït ECHOTYON chane ara koro pipö Pilisti, kïrkegh kilekït nyoni, ompöwölo kilö Tororöt, “Muköy pïchï kïwöghökisyö otini kasïwa poryot akïmïlisyö Misri.”

¹⁸ Kuntöghoghchï ECHOTYON chane kuwit ara surkwen kutang Nanam nyo Pïrir. Otini kingeta pipö Israel koro Misri kïnapate kegh nko karikwa pö lïk.

¹⁹ Kwip Musa koyo Yosep, ompöwölo kökikuwolwolchï Yosep monïngo Israel lö, “Rutoghwekwa Tororöt. Kïlenyona mïchini opökwa koyechan ompö wölï.”

²⁰ Kïpegha chane Sukot akumungö Etam ompö sörömu surkwen.

²¹ Kuntöghoghchï ECHOTYON chane pöghet ompö pchöri polta akuntöghoghchï oghö ompö pchöri ma, atökïrutö chane oghö nko pöghet.

²² Kimöweghönye tawu pich pchöri polta nyo pö pöghet nko pchöri ma nyo pö oghö.