TUMWÖY 96 - PIPÏLIA

¹ Otumchinö ECHOTYON tum nyo tökïrel! Otumchinö ECHOTYON pipö ngwïny kïmïkul!

² Otumchinö ECHOTYON, asal kaynatenyi. Amwatïtena sörunötenyi osis löwïr.

³ Omwochinö pipö punton ngala ororyenyi nko ighisyewutkachi cho echön ompö pich löwïr.

⁴ Wow ECHOTYON akïmïchini kesal nyinte tya, kïkonyïtöy nyinte kïtïl tororötin walaka löwïr.

⁵ Körkeyïntin pat tororötino punton walaka löwïr, wölo ECHOTYON nyo kigh yïmwöy.

⁶ Kiwitwit ororyö nko konyït wölo mi nyinte, kinyïghï owesyö nko pïchighyö Konyi.

⁷ Okonyïtö ECHOTYON, pipö ngwïny kïmïkul, okonyïtö ororyenyi nko owesyenyi.

⁸ Okonyïtö kaynata ECHOTYON, opunö ropöwon, apkan Konyi.

⁹ Asagha ECHOTYON ompö sïro pö saghat. Opotonchenö pipö ngwïny kïmïkul ompö tawunyi.

¹⁰ Omwochinö pipö punton lö, “Pöytoghin ECHOTYON. Kigh ngwïny kwaghïghit nyo metimtimonye. Rwokyini nyinte pich ompö man.”

¹¹ Ngaraka, ngwïnya nko mïröt! Ghumö, we nanam nko tïkwïn löwïr cho mi oringu!

¹² Ongörekyenö parenï nko tïkwïn löwïr cho mi orinkwa. Teghyot nyu ketï wuw ompö ngörekyö,

¹³ atomïla ECHOTYON atökïpayta ngwïny. Pöytoy pipö ngwïny ompö man nko kitenat.