TUMWÖY 94 - PIPÏLIA

¹ We ECHOTYON, Tororöt nyo pö kitakat, ngwanituna lakat!

² Ngeta nyu, nyi nyo irwokyini ngwïny, ighchinö menot lenyini kömïchini!

³ Kwolöy kegh mwokïyis nko oyï nya? Kwolöy kegh akï men nko oyï nya, we ECHOTYON?

⁴ Kwolöy kegh rïmï nko oyï? Akuwulo kegh pörchengwa nko oyï?

⁵ Kechop kong chane piköku, we ECHOTYON akunyaril pich cho le mïlanköku.

⁶ Pöröy mïsïktin nko pönon akïpar to cho möngöy korencha.

⁷ Akïlentöy, “Mösïwïyechanye ECHOTYON. Melö yongöy Tororöt pö Yakopo!”

⁸ Nya kïpköchok ngala we psangengtinechï pö pich, ongöghomöchitunekwa oyï nya sölwöyichï?

⁹ Tororöt nyini kigh yiticha, ononekwa lö mölïmönye kïgh? Kigh nyinte konyicha, olentekwa so mösïwïyinye?

¹⁰ Nyinte nyo pöyu punton, muköy kutöni sitöt? Nyinte nyo netöy pipö ngwïny kïmïkul chïreryö,

¹¹ memukönye so kunkïtu kinonutkökwa? Nkït sölwontönengwa.

¹² Soyönote chi nyo itöninenyi sitöt, we ECHOTYON, aimitenyi inetöy kirurutköku.

¹³ Itöninenyi nyinte kimïny osiswo nyarïl, wölo kïwosöy pïrïm nyo lïku ngöghöpu mwokïyis.

¹⁴ Melö pökoktoy ECHOTYON pikachi anta pïstö mïlankachi.

¹⁵ Tuyot ngat kirwokötö nko man, atökïrïp pipö man.

¹⁶ Ngo nyo ngörokanïn ompö mwokïyis? Ngo nyo mi okuntönyan ompö pich cho ghach?

¹⁷ Ntökimegharakanïn ECHOTYON kitö kyowan oröytö ngwen.

¹⁸ Otini kyolenchan kegh, kachit keltönyan, kïtighanïn chomnyengu nyo pö kokay, we ECHOTYON.

¹⁹ Otini kesusanïn ngala cho chang, isoghsoghaninyi aighanïn oturön.

²⁰ Itïngenyi so kïgh pöytoghï cho le mwokïyis, chane cho tötöy kirurut cho tököwu ghöyityö?

²¹ Tuyot chane atökïrïm pipö man akurwokyï meghat pich cho mötïng lelut.

²² Wölo ECHOTYON nyo le longenyan. Köpönenyan Tororötïnyan nyo oghïponan.

²³ Tököy chane nyarïl ompö ghöyityengwa akïpar chane ompö ngokikwa. Puktoy ECHOTYON Tororötïncha chane.