TUMWÖY 91 - PIPÏLIA

¹ Chi nyo mi ori pö ECHOTYON nyo Töror Tya, nyo wuro kegh Kimuktoghin,

² kïlentöy, “ECHOTYON, ichinyi rïpintenyan nko wölo oghïpenan, Tororötïnyan nyo otwoytonan kegh.”

³ Sörunyi nyinte ompö ngöghöptin, nko sömew nyo pö kiwurat.

⁴ Yenoninyi köpepokachi, itöponyi ato tïghume ompö ripötenyi. Otöptanyi nyo ghanate kï longa.

⁵ Melö iwöghenyi otyogh nyo pö oghö anta kotï cho kïwutu pöghet

⁶ anta iwagh sömew nyo rïmöy pich oghö anta chepköromwö nyo itu pöghet kwen.

⁷ Kïrkegh kewonyeghö pich elpu akong anta elpun taman kuwitinyi, wölo mörikunye wölo imitenyi.

⁸ Isïwïyenyi wölo kichoptoy kong mwokïyis.

⁹ Keghanyi ECHOTYON kïlïkwï wölo irïpchinenyi akïlïkwï Tororöt nyo Töror Tya ghïpöwontengu.

¹⁰ Möminye nyarïl nyo inyorunenyi nyonikïny.

¹¹ Ompöwölo mwochini Tororöt malaykenichi kïripinyi ompö wop anka tïkwïl nyo iwetenyi.

¹² Nömeninyi chane ewunekwa, atömöwir kagh keltöngu.

¹³ Itïkenyi wara ngötïny nko mïny, inyirkitenyi ngötuny nko moroyut.

¹⁴ Lentöy Tororöt, “Osörunan pich cho chömanïn akomönan chane ompöwölo nkïtanïn.

¹⁵ Ongitönchinan chane ato kuranïn. Atomito chane nyarïl, ongörokan, osörunan akonyïtön chane.

¹⁶ Otöninan chane kïmang könyis cho chang aporchï chane sörunötenyan.” Tum pö asispa Sapato.*