TUMWÖY 9 - PIPÏLIA

¹ Oyokunyi sörö tya, we ECHOTYON, ompö mïkulöwunyan kïmïkul. Omwochinan pich töngönchin cho kighanyi.

² Ongörökan ompö nyi otini otuman. Otumunyi, we Tororöt nyo Töror Tya, tumwöyi sölut.

³ Otini kengwïnanyi kïmïlonchö pungköchan akupïtyö akïmeghö.

⁴ Kengarakanïn kirwokengu nyo pö man, otini ketöpenyi ngacharu kirwok, aimut ngal ompö man.

⁵ Kechilanyi pipö punton, kenyaranyi mwokïyis, aipuktö kaynötutkökwa kïpa kokay.

⁶ Kakiwany pungköcha kokay, kenyaranyi kanastinekwa amelö tökenonöy chane ngat.

⁷ Wölo töpo ECHOTYON ngacharunyi kokay, kikuchïchim ngacharunyi nyo pö kirwok.

⁸ Pöytoy nyinte ngwïny ompö man, rwokyini pipö punton ompö man.

⁹ Lïku ECHOTYON wölo ghïpo chi nyo kireyöy, nayat nyo chïchïmate ompö osiswo kömpölelyö.

¹⁰ Töni pich kikönötengwa wölo imitenyi cho nkït kaynatengu, ompöwölo mepïstonyinye, we ECHOTYON pich cho yörinyi.

¹¹ Otumchinö ECHOTYON nyo möngöy Sayon,* omwochinö pich tïkwïn cho kegh nyinte!

¹² Melö wutyegho kitökinto kisön, chane cho kichopöy kong.

¹³ Rose köny, we ECHOTYON, wölo choptenanïn kong pich cho reyanïn! Syonchante aingwïsunena ngwen,

¹⁴ atamukan amwatïta sölutköku ompö kukoti Sayon, atoturönön ompö atoni ompö sörunötengu.

¹⁵ Kakïchïnchï pipö punton pïrïm nyo kapal chane, nömöy chane ngöghöpungwa.

¹⁶ Kinkït ECHOTYON ompö mantanyi, kanam nyinte wökï ompö ighisyewutko ewunekwa.

¹⁷ Petöy mwokïyis ngwen nko pipö punton löwïr cho wutyegho Tororöt.

¹⁸ Melö kïwutyegho chopan kïnomnyö amelö kïwutyegho kikönöto meywon kokay.

¹⁹ Ngeta, we ECHOTYON, mekany ptangengmöt, ikany kerwokyï punton ompö tawungu.

²⁰ Iwira chane otyogh, we ECHOTYON, aikany kunkïtï puntonï lö ptangengmöt chane pat.