TUMWÖY 89 - PIPÏLIA

¹ Otuman chomnyengu nyo pö kokay, kïnomnyö, we ECHOTYON. Omwochinan pïnwöy löwïr, lö, “Ichinyi ghanate.”

² Onkïtön lö töpo chomnyengu kokay, chïchïmate otöptöngu nyo ghanate le yïm.

³ Kelenyi, “Kyaman muma* nko kïlanenyan kyowolwolchan mötworintenyan Daudi lö,

⁴ ‘Oghan orenkwa kïpayta kokay, chïchïmöy paytaghtangu pïnwöy löwïr.’ ”

⁵ Kwolöy yïmwöy töngönchintineku, we ECHOTYON, nko otöptöngu nyo ghanate ompö tuyo chane cho tïlilöch.

⁶ Ngo anka nyo kikongityot nko ECHOTYON ompö yïm? Ngo nyo lata ECHOTYON ompö löwïr cho mi yïm

⁷ nyo konyïtote ompö kokwo cho tïlilöch, wow akewöghöy kïtïl löwïr cho kiwit nyinte.

⁸ Möminye nyo awes le nyi, we ECHOTYON, Tororöt Kimuktoghin. Ichinyi ghanate nyoman.

⁹ Ipöytonyi mirtino nanam cho owesöch aighanyi kïsisyö ato wasawas kegh.

¹⁰ Kitïghönyi tyompö nanam Raap lökïr aitoytoyenyi punköku ompö owesyengu nyo wow.

¹¹ Nyengu yïmö nko ngwïny tïkwïl, kighanyi ngwïny nko kïgh anka tïkwïl nyo mi ori.

¹² Kighanyi wölnö le ewu löt nko ewu tagh. Tumunyi kutïng pö Tapor nko Ermon ompö ngörekyö.

¹³ Tïngeto ewungu owesyö, wechï wow tya owesyengu.

¹⁴ Chïchïmo paytaghtangu pöropchö nko man, ntöghogheninyi chomnyogh nyo pö kokay nko otöptöngu nyo ghanate.

¹⁵ Soyönote pich cho teghyot ompö ngörekyö, we ECHOTYON, chane cho pestoy ompö löpoyïn pö kisyonötengu!

¹⁶ Ngörechot chane kwimön ompö nyi akïsölinyi ompö mantangu.

¹⁷ Ichinyi ororyö owesyencha, kïnyorucha rïntagh ompö kisyonötengu.

¹⁸ Ngwïno longencha ECHOTYON akungwïno pöytoghintencha Tororöt pö Israel nyo Tïlil.

Kiyomisöto Tororöt ompö Daudi

¹⁹ Kimwochinyi ompö sïwïyagh könyisyok mötworiku cho ghönote lö, “Kyotönön paytagh chi pö lïk nyo kyotörorön akekïl ompö kwenu pich.

²⁰ Kyonyorwan mötworintenyu Daudi akayilan mwadanyu nyo tïlil kïlïkwï nyinyan.

²¹ Töpo owesyenyan nko nyinte osis löwïr, chïchimöy ewunyan nyinte.

²² Memuköcha pungkachi ntökïrïnta amemuköcha mwokïyis ntökunyaril kong.

²³ Otïghan pungkachi lömïs aparan pich löwïr cho reyöy nyinte.

²⁴ Wölo töpo otöptönyan nyo ghanate nko chomnyenyan nyo pö kokay nko nyinte akïrïntoy nyinte pungkachi ompö kaynatenyan.

²⁵ Opöroyan paytaghtanyi kïngata nanampa Kwen ntökwit lalwa Yuparet.

²⁶ Lenchinanïn nyinte, ‘Ichinyi paponyan aichï Tororötïnyan nko ghatya sörunötenyan.’

²⁷ Oghan nyinte kïlïkwï werïnyan nyo le poret, wowitu nyinte kïtïl pöytoghi ngwïny kïmïkul.

²⁸ Otönan nyinte chomnyenyan nyo pö kokay akughyongöy mumenyan nko nyinte kokay.

²⁹ Ochïchiman orenyi kokay, töpo paytaghtanyi le yïm kokay.

³⁰ “Wölo ato pïstö monechi kirurutköchan akïtagh kïrïp kinetutköchan,

³¹ ato peny chane ngalechan akïpïstö kirurutköchan,

³² omungan nyu chane ompö lelutyengwa, onyörilan chane kong ompö ghöyityengwa.

³³ Wölo mopïstonanye chomnyenyan nyo pö kokay nyo otïngan Daudi, amelö owöghökan otöptönyan nyo ghanate ompö nyinte.

³⁴ Melö onyoran mumenyan nyo kyaman nko nyinte anta awaghach ngölyon nyo kingwïna kutinyu.

³⁵ “Kyawalwalan ompö kaynatenyan nyo tïlil kïnyïl lö, melö omwochinan Daudi putintön.

³⁶ Töpo orenyi kokay akïtöpö paytaghtanyi le asis.

³⁷ Töpo kokay le arawa, söwin nyo mi yïm nyo ghyongtoy.”

Rirat ompöwölo kakïrïnta pöytoghin

³⁸ Wölo kenyölechinyi ye pöytoghintengu nyo kikïlanyi, ketaghanyi nyinte aipïstö.

³⁹ Kenyaranyi mumengu nko mötworintengu kepurpurenyi sonkolyenyi terïtyon.

⁴⁰ Kenganganyi nayatu kanasyantenyi airultö nöyet cho kikörtegho kegh.

⁴¹ Kachor pich cho weröy atoni tïkuchi, kerat pöröriskachi nyinte.

⁴² Kepïsinyi pungkachi kïrïnta nyinte, aigh chane löwïr kïngörekyö.

⁴³ Keghanyi chokenyi kïmïtusit, amengarakanïnye nyinte ompö poryot.

⁴⁴ Kesarenyi nyinte lïpö paytagh aipurpurö ngwïny ngacharunyi.

⁴⁵ Keyositanyi nyinte kïtomö kwitïta könyiswechi ailuma nyinte arasï.

Saghata sörunogh

⁴⁶ Iwïnyenyi kegh nko oyï, nya ECHOTYON? Nöghöy nyölotyengu le ma nko oyï?

⁴⁷ Inan, we ECHOTYON, ngörïngïn pö osiswechan, ki pö nenyu teghechanyi ptanengmötin cho kïmeghot.

⁴⁸ Chi ngo nyo söpöy amömeghöy? Ngo nyo muköy kïchïwïto owesyo ngwen?

⁴⁹ Mi onö chomnyengu nyo pö kokay nya Echotyon nyo kiwolwolchinyi Daudi ompö otöptöngu nyo ghanate?

⁵⁰ Inan, we Echotyon, wölo kikïratïta mötworintengu, nko wölo omïkuköntonan kimwoghsyö nyo pö punton.

⁵¹ Rotöy punköku pöytoghintengu, we ECHOTYON, ompö wop anka tïkwïl wölo weröy.

⁵² Okwolö ECHOTYON kokay! Amen! Amen!* Saghata Musa, chi pö Tororöt.