TUMWÖY 86 - PIPÏLIA

¹ Iterwante, we ECHOTYON, aiwöghökwante, ompöwölo ochan meywon achan nyarkalal.

² Irip söpontönyan ompöwölo oghöninyi. Isörwante, ompöwölo ochan mötworintengu nyo ghanate.

³ Ichinyi Tororötïnyan, kïlenyona isyonchante, ompöwölo orirchininyi kwimön.

⁴ Konante mötworintengu ngörekyö, we Echotyon, ompöwölo mi kikönötenyan wölo imitenyi.

⁵ Ichinyi karam, we Echotyon, ailöstoghchini pich ngokï akï wow chomnyengu nyo pö kokay ompö pich löwïr cho soghinyi.

⁶ Iterwante saghatenyu, we ECHOTYON ailïm lokechan.

⁷ Okurinyi ompö osiswo nyarïl, ompöwölo iwöghökwaninyi.

⁸ Möminye tororöt anka nyo karkegh nko nyi, we Echotyon, amelö mi nyo muköy kwighöy cho ighenyi.

⁹ Pkonöy pipö punton löwïr cho kighanyi akïsaghinyi, we Echotyon, töroröy chane kaynatengu.

¹⁰ Ichinyi awes nyoman aighenyi tïpö töngönchin, ichinyi Tororöt onkït.

¹¹ Netante, we ECHOTYON, kïgh nyo imökenyi oghan, atarïpinyi ompö man ainet mïkulöwunyan kïkonyït kaynatengu.

¹² Osölinyi ompö mïkulöwunyan kïmïkul, we Echotyon Tororötïnyu, otöroran kaynatengu kokay.

¹³ Ompöwölo wow chomnyengu nyo pö kokay ompö ani. Kesörunenyi söpontönyan le ngwen.

¹⁴ Köporyeghenanïn chelölos, we ECHOTYON, mököy söpïch pö pkatis kïpöranïn, melö yonginyi pïchoni nyonikïny.

¹⁵ Wölo nyi, we Echotyon nyo ichï Tororöt pö kisyonchin nko pöropchö, melö ichinyi nörekin, wölo pö chomnyengu kokay akeghöninyi.

¹⁶ Pörunö wölï omitan aisyonchanïn, konante owesyö aisörwante, ompöwölo ochan monto cheptöngu.

¹⁷ Porwante köromnyengu, we ECHOTYON, atö kïsïwa arasï cho reyanïn kïnyorï chane arasï, ato sïwa lö kengarakaninyi aisaghsaghanïn. Tum pö werpö Kora.