TUMWÖY 84 - PIPÏLIA

¹ Ochöman möngengu lö ne nya, we ECHOTYON Kimuktoghin!

² Omchinanïn emö kïtya, Kö nyo pö Tororöt! Tumchini mïkulöwunyan kïmïkul Tororöt nyo satate ompö ngörekyö.

³ Nyoruno alurïtinö tïkwïl möngengwa Kongu, akïtek wistina korikwa, cho yichini ato kïpelo amöros, we ECHOTYON Kimuktoghin,

⁴ Ngörekyote kïtya nya pich cho möngöy Kongu akïsölinyi kïtenö osis.

⁵ Soyönote pich cho nyorchini owesyengwa cho chïrpöchech chini mïkulöwekwa ompö ortïn cho töngöy Sayon.*

⁶ Wöghöko mpöghoghyo Paka, kïlïkwï kori pöghon otini weröy chane, nyïghitöy ngörpil pö pögh cho kösyökï.

⁷ Töso owesyengwa otini petöy chane, akïsöchï Tororöt pö tororötin Sayon.

⁸ Iter sowutköchan ECHOTYON Tororöt Kimuktoghin ilïm, we Tororöt pö Yakopo!

⁹ Soyönö pöytoghintencha, we Tororöt, aisyonchï kïlanengu.

¹⁰ Kaykay asis akong ompö Kongu kïtïl cho le elpu akonga ompö kareran, ochöman olïku ripinto kuka Kö pö Tororötïnyan,* kïtïl amangan kestoni mwokïyis.

¹¹ Ompöwölo ECHOTYON Tororöt kï asis akï longa, soyönecha nyinte ompö tölosyö nko konyït. Mötöghonye ECHOTYON kïgh nyo karam, pich löwïr cho ighöy man.

¹² Soyönote chane löwïr cho köninyi, we ECHOTYON Kimuktoghin! Ompö kintöghoghinto tumï. Tum pö werpö Kora.