TUMWÖY 81 - PIPÏLIA

¹ Otumchinö Tororöt nyo le owesyenyo, oturönchinö Tororöt pö Yakopo!

² Otumö arat kwïrkwïris apït pïkantis nko pkurerun.

³ Akuta konti relïn pö arawa nko ato kighyö arawa, otini kyomöy ichon nyo wow.

⁴ Ompöwölo kirurut nyoni ompö Israel nyo mwoghöy Tororöt pö Yakopo.

⁵ Kitö Tororöt kirurutyononi pipö Israel otini kiporyeghö koro Misri. Kyalïman kut nyo melö onkïtön kïlentöy,

⁶ “Kangwïsan pötoghkökwa nïkisïn, achengan morikwa mataparin cho nïkisöch.

⁷ Kyokuranïkwa ompö nyarïl osörwokwa. Kyongitönwokwa ompö tïlöt ompö wïngat. Kyatyamenokwa kori pöghoni Meripa.

⁸ Atera, we pikachu, orurokwa, ntökolïmekwa ngalechan, we pipö Israel!

⁹ Mopöghisyechï tororötin walaka amokïlchï tororötino putintön.

¹⁰ Ochan ECHOTYON Tororötïnkwa nyo kyamïtunenekwa koro Misri. Ayata kutïwekwo atapaghakwa.

¹¹ “Wölo melö kiter piköchan ngalechan, melö konyïtanïn pipö Israel.

¹² Opïstan nyu chane kïrïp tighintöno mïkulöwekwa, atökwigh kïgh anka tïkwïl nyo kacham chane.

¹³ Ntököterwanïn piköchan wey, akïrïp pipö Israel ortïnechan!

¹⁴ Kötö owonyan pungkökwa lawel, akötö orïntonan pich cho nyorïlöy chane kong.

¹⁵ Kötö kïtïngchinanïn pich cho reyanïn, akïpöyitu kokay nyarïltangwa.

¹⁶ Wölo kötö opöghenokwa nkanun cho pïchighöch akonokwa kumat opïghyongö.” Tum pö Asap.