TUMWÖY 80 - PIPÏLIA

¹ Terwecha sowutköcho, we Mösöwonto Israel, nyi nyo intöghoghchini monïngo Yosep le kechir, nyi nyo itöpo paraku kerupimtin* ailïwï

² ompö Epraim nko Penchamen nko Manase. Porwecha owesyengu aingwïn tesörwecha!

³ Yokyecha otöptönyo ngat, we Tororöt! Porwecha kisyonötengu atökesörwecha!

⁴ We ECHOTYON, Tororöt Kimuktoghin, inörekyinenyi sowutko piköku nko oyï nya?

⁵ Kekonechanyi makatyanta nyarïl kyama akeghegha lok mpalaw nyo wow.

⁶ Keghanyi kureyecha pörörisköcha, ntökïroröchecha pungköcho.

⁷ Yokyecha otöptönyo ngat, we Tororöt Kimuktoghin! Porwecha kisyonötengu atökesörwecha!

⁸ Kipunenyi Misri ket pö sapipïyon, kiyonenyi pipö punton aikatkatanyi ketoni korengwa.

⁹ Kirösönyi kore, kïpit ighinkachi kïghömï korononi.

¹⁰ Kuyen rurwenyi kutïngkot, kulum morichi tarakit cho echön

¹¹ Kughïtö morichi ntökwitïta nanampa Kwen, akulet ntökwitïta söröm lalwa Yuparet.

¹² Ompö ne nyu tenganganyi nïyetkachi tökïpïtotoy pich cho weröy akwechi?

¹³ Kunyarnyar mulunchöy ketït akïpagha kegh tïpö wudïn!

¹⁴ Yokyecha kegh, we Tororöt Kimuktoghin, topönecha ompö yïm airosecha, rökunö aisörï sapipïyontonï,

¹⁵ ketï kikatkatenyi ewungu, ketï kesïl kighanyi kïpit.

¹⁶ Kapel pungköcha akurultö ketoni nya kuwonyö chane ompö köromnyengu.

¹⁷ Nya kïtöpö ewungu nyo pö tagh paraku chichoni, wero chi nyo kikïlanyi kwawesit,

¹⁸ amelö tökepïstonecha nyi kokay. Ikonecha söpon atökesalacha kaynatengu.

¹⁹ Yokwecha otöptönyo ngat, we ECHOTYON, Tororöt Kimuktoghin. Porwecha kisyonötengu, atökesörwecha. Ompö kintöghoghinto tumï, kïrïp kegh nko kuti Kat. Tum pö Asap.