TUMWÖY 78 - PIPÏLIA

¹ Atere kinetutköchan, akwa pikachu, alïma ngalechan lasiny.

² Omwowunan ompö körkeyïntin. Ongölonan ngötïnyö cho pö köny,

³ ngal cho kikïlïmacha akenkïtï, kimwoghöy papotïnecha.

⁴ Melö kïwïngocha monecho, kïmwochinecha pïnwöy cho tökïpkonöy owesyo ECHOTYON nko töngönchintinechi cho kigh.

⁵ Kitö kirur monïngo Yakopo akutö kirurut pipö Israel akïmwochï papotïnecha kunet monekwa ngalechi,

⁶ tökunkïtï pïnwöy cho pkonöy kirurutkachi, kunet chane tïkwïl monekwa.

⁷ Atökumï chane tïkwïl kutö kikönötengwa Tororöt, atömötöp chane ntökïwutyeghö ighisyewut pö Tororöt, wölo tökïrïp kïnomnyö kirurutkachi.

⁸ Atömökarkegh chane nko papotïnekwa cho kile penyï akï tighï, pïn nyo melö kitenat ompö mïkulöwekwa amelö kighanat Tororöt.

⁹ Kimïlonchö löt pipö Epraim cho kitïng kïwantis nko kotï otini kimi poryot.

¹⁰ Melö kirïp mumengwa nko Tororöt akïtagh kïrïp kirurutyenyi.

¹¹ Kiwutyeghö tïkwïn cho kikwigh nyinte nko töngönchintin cho kökikuporchï chane.

¹² Kigh nyinte tïkwïn cho echön ompö tawu papotïnekwa ompö tömko Soan nyo mi koro Misri.

¹³ Kichagh nanam akïkany kwoghyö chane akwigh pögh kughyö le nayat.

¹⁴ Kintöghoghchï chane ompö polta pöghet akumït chane oghö ompö löpoyïn pö ma.

¹⁵ Kikarer ghatoy ompö sïrkwen akutö chane pögh cho chang le cho pö kori pöghon.

¹⁶ Kigh champilwoy kïpkana ghat, akwigh kuyinta le lalwatïn.

¹⁷ Wölo kitas tagh chane kwighchï Tororöt ngokï, kïpeny Tororöt nyo Töror Tya ompö surkwen.

¹⁸ Akïtyam Tororöt kunkït otini kitep nyinte kutö chane omisyö nyo kïropchini.

¹⁹ Kingalana chane Tororöt nyo gha kïtep lö, “Muköy so Tororöt kïpaghecha ompö surkwen?

²⁰ Kilï ghat kïmïlï kegh pögh kuyinta lalwatïna kïmïr kiror wölo muköy ye kïkonecha omisyö akïkonecha pany?”

²¹ Kïlenyona kïngwanit nörekyo ECHOTYON tya otini kilïm, kula lakat nörekyenyi ompö monïngo Yakopo, kïtasa köromnyenyi ompö pipö Israel,

²² ompöwölo melö kitwayta kegh chane Tororöt anta ghan owesyo sörunötenyi.

²³ Wölo kuchik poltoy ompö mïröt akïyat kukoti yïm,

²⁴ kïropönï mana cho kyam chane akutö chane pagha yïm.

²⁵ Kwam nyu pich omisyo malayken, kutö Tororöt chane omisyö kïmïchï.

²⁶ Kïkut yomo kongasis kïwö yïm akuntöghoghchï yomo, okumpö tagh ompö owesyenyi.

²⁷ Kïropchï pikachi pany le terït kïrongwï törit cho tenö ngayam ompö nanam

²⁸ akïkany kïchïnchini möngengwa, kïghömï wölini möngöy.

²⁹ Kwam nyu pich ntökïpïghyö nyoman, ompöwölo kitö Tororöt tïkwïn cho kipïrchini chane.

³⁰ Wölo otini kitomönye kuwonyö pïrchintöngwa, otini kitökïmi omisyononi kutïwekwa,

³¹ kïngwanit lakat nörekyo Tororöt ompö chane, kïpar nyökonkökwa nko naranpa Israel.

³² Kïrkegh kinyorï pïchoni tïkuchoni, wölo kïtas tagh kwigh ngokï. Kïrkegh kisïwa töngönchintin wölo kitagh kughan nyinte.

³³ Kïnïk nyu osiswekwa le kimïny akuwonyö könyiswekwa lawel ompö ngwonïn.

³⁴ Otini kipar Tororöt chane, kïyar nyu chane nyinte, kïkötö akïyar Tororöt ompö kikilöto kegh.

³⁵ Kunan lö ki Tororöt nyo kile ghatyengwa akï Tororöt nyo Töror Tya nyo kile sörunintengwa.

³⁶ Wölo kilïsa chane Tororöt kutïwekwa, kïmwa putintön.

³⁷ Melö kighönote chane ompö tawunyi amelö kirïp mumenyi.

³⁸ Wölo kusyonchï Tororöt chane, nyinö kitöpöröy kïlöstoghchï chane ngokikwa akïwaghach nörekyenyi kïnyïl cho chang. Melö kipïsyï köromnyenyi kingwanit lakat

³⁹ Kipköchï nyinte lö ki ptangengmöt chane pat cho karkegh nko yomöt nyo weröy akupot.

⁴⁰ Kipeny chane nyinte kïnyïl cho chang ompö surkwen akuchop kong nyinte ompö wölini.

⁴¹ Kïtyam Tororöt kïnomnyö, kïtapatap Tororöt pö Israel nyo Tïlil.

⁴² Kiwutyeghö chane owesyenyi nyo wow, nko asisanya kisörunö Tororöt chane pungkökwa,

⁴³ otini kipörchï Tororöt chane machey ompö Misri nko töngönchintin cho kigha tömko Soan.

⁴⁴ Kiwaghach lalwatïnekwa kïlïkwï kisön atömökumï nyu pipö Misri kïgha pögh.

⁴⁵ Kiyonchï chane kolyong kïpa kusus chane nko mnyakaway cho kipchï kinyarat.

⁴⁶ Kiyonchï ptölök kwam paghekwa akunyar talam parenikwa.

⁴⁷ Kinyara sapipunekwa takarïs akuwanya kaghïtan makanykakwa.

⁴⁸ Kipara twakwa takarïs akwam ilat kechiryekwa.

⁴⁹ Kïnörekyï chane kïngwanit lakat le malaykayanta poryot.

⁵⁰ Melö kiyoda nörekyenyi anta sörunö chane meghat, wölo kipara chane amal.

⁵¹ Kipar poretay Misri löwïr, kipar twatanpa Am.

⁵² Atolapay kuwï pikachi le kechir akuntöghoghchï ompö surkwen le okwot.

⁵³ Kintöghoghchï chane ompö kalya atömewöghisyö, wölo kilum nanam pungkökwa.

⁵⁴ Akuwï chane kïpa ntökwit korenyi nyo tïlil, ntökwit kutïng nyo kirïnta nyinte ompö owesyenyi.

⁵⁵ Kiyona nyinte pipö punton tawungwa, akutö pipö Israel kïmïl koroswekwa, kitö nyinte ortïna pipö Israel möngengwa.

⁵⁶ Wölo kipeny chane akïtyam Tororöt nyo Töror Tya amelö kirïp kirurutkachi.

⁵⁷ Kimostoy chane akïrïp otöptineko papotïnekwa cho kipuryö kighanat, kïchumponchö le kotöt nyo mörkel.

⁵⁸ Kwigh nyinte kïnarek ompö tororötino punton akwigh nyinte kïlïkwï söstoghin ompö körkeyïntinekwa.

⁵⁹ Nyini kisïwa Tororöt lenyoni, kïnarek akïtagh Israel nyoman

⁶⁰ akuchal möngenyi nyo kimi Syilo, Ema nyo kimang nyinte ompö kwenu pikachi.

⁶¹ Kichalta Santuku Muma* kïpar pung, macheypa owesyenyi nko ororyenyi.

⁶² Kïpïstö pikachi kuwonyeghö chok otini kinörekyï chane.

⁶³ Kiwonyö chumwak akwompö poryot ntömökïnyorïnye mïrör mïrön.

⁶⁴ Kikïpar tïsikwa ompö chok amelö kimï kïriryö.

⁶⁵ Atolapay kïnget Echotyon le chi nyo ngetuno rïwön, le nyakan nyo kanam sirmoy ato gha kumïn.

⁶⁶ Kïporyeghö pungkachi akïyon akutö arasï nyo pö kokay.

⁶⁷ Kitagh nyinte monïngo Yosep, amelö kikïl pipö ara Epraim,

⁶⁸ wölo kikïl monïngo Yuda nko kutïng pö Sayon* nyo kicham lö ne!

⁶⁹ Kïtek nyu atoni Konyi, nyo karkegh nko möngenyi nyo mi yïm akwigh kïchïchïm kokay le wölo lata ngwïnya.

⁷⁰ Kikïl mötworintenyi Daudi, kimïtuna nyinte acheypa kechir.

⁷¹ Kikur nyinte otini kimi kiyakuyat akwigh kïlïkwï pöytoghinto Israel akïlïkwï mösöwonto pipö Tororöt.

⁷² Kiyakwïy Daudi chane ompö man akuntöghoghchï ompö ngöghomnyö. Tum pö Asap.