TUMWÖY 76 - PIPÏLIA

¹ Kinkït Tororöt ompö Yuda, wow kaynatenyi ompö Israel.

² Mito möngenyi Yerusalem, möngöy kutïng pö Sayon.*

³ Kirïnga wöloni koti pung akïrïng longoy nko chokon nko kari lïk.

⁴ Ichinyi töror, we Tororöt. Nyïghitateninyi ororyö otini kemïleghenyi kutïngkot cho kerïnteghenyi pung.

⁵ Kakïsara nyökonkökwa pöröwekwa kinam chane rïwönto lömïs, kupöl kïsyol chi anka tïkwïl ewunyi.

⁶ Otini kiteghchinyi chane, we Tororöt pö Yakopo, kïmeghö angoletinekwa nko pikö cho kipegho.

⁷ Nyi onkït, we ECHOTYON nyo kiwöghöy, möminye chi nyo ghyongo tawungu otini kenyalenyi.

⁸ Kimwowunenyi ngaleko kirwokengu wölini le yïm. Kuwöghisyö ngwïnya akïsï lasay,

⁹ otini kinget ECHOTYON akurwok, atökïsörï pipö ngwïny löwïr cho kikirey.

¹⁰ Wöghöko nyo mötïny nyölotyo pich kïsölinyi, otini kerötyinyi mu nyölotyengu nyo pö söröm.

¹¹ Owolwolchinö kïgh ECHOTYON Tororötïngwo apuntö. Nya kwipchï nyinte koroswö cho lekïtöch ropöw, opchinö ECHOTYON nyo kiwöghöy,

¹² nyinte nyo optegho chönökopïr, akwotyeghö pöytoghi ngwïny. Ompö kintöghoghinto tumï. Kïrïp kegh nko Yedutun. Tum pö Asap.