TUMWÖY 73 - PIPÏLIA

¹ Karam Tororöt nyoman ompö Israel, ompö pich cho tïlilöch mïkuliskökwa.

² Wölo kirich nyoman achitan kedong kite apïtan.

³ Ompöwölo kyotïngetan saghsaghat ompö menot, otini kyasïwan pöghisyö nyo kitïng mwokïyis.

⁴ Mönyorucha ngwonïn chane akï karamach porwöyikwa chane.

⁵ Mötïngcha nyörilwok le pich walaka anta nyorï kichopata kong.

⁶ Nka nyoni kewusö chane menotön kotwonikwa akulak köromnyö le sïra.

⁷ Kikutu konyikwa ompö nörotyö, pkono mïkuliskökwa tötut cho pö ghöyityö.

⁸ Rorochini chane pikö walaka ompö semsem, kwolöy kegh chane akïtat ngal cho ghach cho rïmo pikö walaka.

⁹ Ighchini chane nyo gha Tororöt nyo mi yïm, akwar pich ompö ngwïny.

¹⁰ Kwigh ompö chini le pipö Tororöt kïwöghökisyö kutang wölo mi chane akughan ngölyon anka tïkwïl nyo mwoghöy.

¹¹ Kïlö chane, “Nkïtu lö ne Tororöt? Akumuköy nyo Töror Tya kunkïtu?”

¹² Lenye nyoni wölo lata mwokïyis. Tïngeto chane kïgh anka tïkwïl akïtösöy walaka kïchangit kïtenö osis.

¹³ Ayo, kichö oripan so mïkulöwunyu kïtïlilit arip portanyu tömagh ngokï kwïle?

¹⁴ Kakïmunganïn kïtenö osis akenyarilanïn kong tökwoghö anka tïkwïl.

¹⁵ Ntökile nyo kyangalanan le nyï, kitö owökan piköku, we Tororöt.

¹⁶ Kïlenyona, otini kyananan choni löwïr, kwawesit tya ompö ani,

¹⁷ ntökïtenö olïtön Kongu nyo pö saghat, atoni nyu ato kyonkïtwan sörömungwa.

¹⁸ Itöninenyi kughyongö chane wölo chïtchït atökupïtyï wölo wonyegho.

¹⁹ Wechï nyorisyot chane lawel akemista ompö otyogh kïlowöchitu.

²⁰ Weröy chane lawel, we Echotyon, otini kelïtinyi le kirwotïtogh nyo weröy otini kanget chi.

^21-22 Kyochan sölwö le kech, otini kingwanit mïkulöwunyan, alïmchan ngwonïn söpontanyu. Melö kyonkïtunyi nyonikïny!

²³ Wölo kïrkegh kïlenyoni, we Tororöt, anyï omitan nko nyi kïnomnyö aiminyi inömöy ewunyan.

²⁴ Nyi nyo intöghoghwanïn ompö kirurötengu. Ato mi löt itakaninyi atwan wölo mi ororyö.

²⁵ Ngo nyo otïngetan ompö yïm kïpoto nyi? Akï ne nyo toyöran ato omitan nko nyi?

²⁶ Kïrkegh kanyarkalalit portönyan nko mïkulöwunyan, wölo owesyenyan Tororöt akï mïlatenyan kokay.

²⁷ Kinyoröy pich cho lowöch nko nyi nyo mötïny. Iwongenyi pich löwïr cho wökinyi.

²⁸ Wölo nyo le ani, mïchinanïn olekïtitwan nko Tororöt. Oghïponan ECHOTYON Tororöt. Omwotïtonan ngal löwïr cho kigh nyinte. Tum pö Asap.