TUMWÖY 72 - PIPÏLIA

¹ Itö pöytoghin kirwokötengu, we Tororöt, nya kïsïch nyinte mantangu,

² atökïpayta piköku ompö man akurwokyï mey kuten.

³ Nya kïsïch ngwïnya pöghisyö akïrumtö man ompö kore kïmïkul.

⁴ Nya kungarak pöytoghintö mey akutokunö chopot akuwany pich cho pïröy pikö walaka.

⁵ Nya kïsöp nyinte osis löwïr cho tökulïwu asis, otini kïnye tökulïwchini arawa pïnwöy cho tökïpkonöy.

⁶ Nya kïkarkegh nyinte nko rop nyo ropönchini paren le pkopïs ompö ngwïny.

⁷ Nya kusïl man osiswechi löwïr akïtasa pöghisyö ntökïtenö kumisö löpoyïn pö arawa.

⁸ Nya kïpayta kïngata nanam ntökwitïta nanamu anka akïngata lalwa Yuparet ntökwitïta sörömu ngwïny.

⁹ Nya kungïrukyï pipö surkwen nyinte. Kïtïngchini pungkachi nyinte.

¹⁰ Nya kwipchï ropöw nyinte pöytoghi Tarsis nko koros cho mi nanam akwipchï nyinte ropöw pöytoghi Syepa nko Sepa.

¹¹ Nya kïkonyït pöytoghï löwïr nyinte akïpöghisyechï puntonï löwïr nyinte.

¹² Söru nyinte chopot cho rirchini nyinte nko mey cho mötïngcha kingörokin.

¹³ Syonchini pich cho nyörkölöl nko chopot akïsörï söponwekwa.

¹⁴ Söruno nyinte chane pïrï nko pkatis, tïng olyot söponwekwa ompö nyinte.

¹⁵ Nya kïsöp pöytoghintö nyo kogh! Nya keropchï nyinte koltin cho pkono Syepa. Nya kesoghchï nyinte kïnomnyö. Nya kesoyön nyinte osis löwïr.

¹⁶ Nya kïpituna pagh kor cho chang akulum kutïngkot. Nya kïkarkegh ilötenyi nko nyo pö Lepanon. Nya kïchangit pich ompö kanastin le sus cho mi wuw.

¹⁷ Nya kenan kaynata pöytoghin kokay nko ororyenyi le asis. Nya kusoyönisyö puntonï löwïr ompö nyinte. Nya kekurö nyo soyönote.

¹⁸ Sala ECHOTYON, Tororöt pö Israel! Nyinte onkït nyo ighöy tïku töngönchin.

¹⁹ Asala kokay kaynatenyi nyo töror. Nya kunkïtï ngwïnya kïmïkul ororyenyi. Amen! Amen!*

²⁰ Sörömu saghata Daudi, wero Yese. Tum pö Asap.