TUMWÖY 71 - PIPÏLIA

¹ Kangwïnan wölo imitenyi, we ECHOTYON, ataghïpeninyi, mepïstante onyorï arasï!

² Ngarakante aisörwo, ompöwölo iponyi man. Terwante aisörwante!

³ Lïkuna köpönenyan nyo oghïpenan, teköwon nyo awes nyo sörwanïn, ompöwölo ichinyi köpönenyan nko teköwontenyan.

⁴ Sörwante, we Tororötïnyu, atachïwïtan mwokïyis. Sörwante achïwïta penyï nko pkatis.

⁵ Ichinyi kikönötenyan, we Echotyon TORORÖT. Kyoköninyi kïngata otini kyapuswan.

⁶ Kyotighan kegh nyi kïngata otini kikïyiyanïn, nyi nyini kimïtwanïn angwïna muyeto yonyu. Osölinyi kïtenö osis.

⁷ Kalïkwan körkeyïn ompö pich cho möngörï, ompöwölo ichinyi wölo oghïponan nyo awes.

⁸ Möngetonye salatengu ngalyapunyan, omwotïtonan ororyengu kwimön.

⁹ Metaghante otï le ye kayositwan amepïstante ye otï kamïnïngit owesyenyan.

¹⁰ Ngölonenanïn pungköchan, nömöy kegh pich cho söpchinanïn

¹¹ akïlö, “Kikïpïstö Tororöt nyinte. Arïpa anam nyinte, ompöwölo melö tökïmi chi nyo söru!”

¹² Melowitï nko ani, we Tororöt, nyonö lawel, we Tororötïnyu, atengarakante.

¹³ Nya ketö arasï akewany pich cho poryeghenanïn, nya kulum kigheghchin nko sas, chane cho mököy kïrïmanïn.

¹⁴ Wölo okönisïyan nyo le ani kïtenö osis, atösan tagh osölinyi kïnomnyö.

¹⁵ Mwotïtoy kutinyan ighisyewutköku cho pö man, omotonan kwimön ngaleko sörunötengu, kïrkegh monkïtönye löwïr.

¹⁶ Osölan ighisyewutköku cho echön, we Echotyon TORORÖT, nko mantangu nyo le nyengu onkït.

¹⁷ Kinetaninyi, we ECHOTYON, kïngata otini kyapuswan amwotïtonan ighisyewutköku cho pö töngönchin.

¹⁸ Mepïstante, we Tororöt, otï le ye kyayositwan akïrelitwanïn möt! Töpenö nko ani otï ntökïtenö omwochan owesyengu pïnwöy cho tökïpkonöy.

¹⁹ Itïtoy mantangu wölini le yïmwöy, we Tororöt, keghanyi tïkwïn cho echön tya. Möminye chi nyo kikongityot nko nyi.

²⁰ Kekonaninyi nyarïl nko kömpölelyö, wölo ikonaninyi söpon ngat, airipaninyi tömolïtön ngwen.

²¹ Itöswaninyi konyït aisoghsoghaninyi ngat.

²² Osölinyi ompö pïkan, ompöwölo ichinyi ghanate, we Tororöt. Otumunyi sölut ompö pïkan, we Tororöt pö Israel nyo Tïlil.

²³ Ngörököy kutinyan nyoman, otini otumunyi sölut akïngörököy mïkulöwunyan, ompöwölo kesörwaninyi.

²⁴ Ngölonöy ngalyapunyan mantangu kwimön, ompöwölo kikerïnta aketö arasï pich cho kömököy kwighwanïn nyo gha. Tum pö Solomon.