TUMWÖY 65 - PIPÏLIA

¹ Mïchinecha, we Tororöt, kesalachanyi ompö Sayon* akekonyït ayomistin cho kikiyomisunyi,

² ompöwölo ilïmenyi sowutköcha. Pkonchininyi ptangengmötin löwïr

³ akwompö ngokikwa. Kïrkegh otini karïntecha penyutköcha, kïtelöstewechanyi.

⁴ Soyönote pïchoni kikïlanyi, choni kimïtunyi kïpka möngengu. Kïpïghyongecha ompö köromnyengu nyo mi kongu nyo tïlil.

⁵ Kewöghökunyi aisörwecha ompö töngönchin, we Tororöt, nyo le sörunötencha. Twoytoninyi kegh pich ompö ngwïny kïmïkul ntökwit sörömu nanam.

⁶ Kighanyi kutïngkot ompö owesyengu aiporï kimukatengu ompö choni.

⁷ Ighöy Tororöt nanam nyo tïlöy kïsï nko mirtino pögh akwighöy pich cho tïlyot kïsisyö.

⁸ Töngönchini ngwïnya kïmïkul ighisyewutköku cho echön. Ipchini ngörekyö woptin löwïr, kïngata kongasis ntökwit to.

⁹ Ikomönenyi ngwïnyinï otini iropönchinenyi aigh kïsïkönon aikany kwakwaghit. Mötengotya lalwatïneku keperurönyi kor kïnyorï pagh, ompöwölo kighanyi lenyoni.

¹⁰ Iropönchinenyi parenicha ainyïrkilönyi ompö pkopïs aperurönyi kösïghe kïghya.

¹¹ Iperurenyi koro kïnyorï ilö, rulyot töpotonikwa ompö chongïn pö pagh.

¹² Kinyïghï okwoghyö wölo le achey, kuwit ngörekyö wölo le komos.

¹³ Kïlïm kechir wölo le kew akulak pagh wölo le mpöghogh. Teghyot löwïr akïtum ompö ngörekyö. Ompö kintöghoghinto tumï. Tum.