TUMWÖY 6 - PIPÏLIA

¹ Mechilante, we ECHOTYON, ompö nörekyengu, anta ichopanïn kong ompö sïngiryengu.

² Syonchante, we ECHOTYON, ompöwölo kaman tangany. Isopante we, ECHOTYON, ompöwölo kinyöryanïn ko.

³ Akïmi nyarïl nyo wow söpontönyan. Nko oyï, nya ECHOTYON nko oyï?

⁴ Waghakena, we ECHOTYON, aisörï söpontönyan, sörwante ompö chomnyengu nyo pö kokay.

⁵ Möminye chi nyo noninyi ato kikïma amöminye chi nyo sölinyi ompö ngwen.

⁶ Kaghachan ompö sönönötenyan. Kinïra pöröyunyan lok oghö anka tïkwïl. Kegh lokechan pöröyunyan kïwasta.

⁷ Melö tosïwïyan lasiny, kökutu konyichan ompö lok, ompöwölo kechopanïn kong punkachan.

⁸ Apeghena wölo omitan pïchï ghach! Ompöwölo kikïlïm ECHOTYON riratenyan.

⁹ Kakïlïm ECHOTYON somsyenyan. Chömöy nyinte saghatenyan.

¹⁰ Nyoru arasï pungköchan löwïr akïmeghö mutïnö. Mïlonchöt chane löt akïnyorï arasï lawel. Rirata Daudi nyo kitumchï ECHOTYON ompö paraku Kus nyo pö ara Penchamen.