TUMWÖY 59 - PIPÏLIA

¹ Sörwante, we Tororötïnyu, atachïwïtan punkachu, ighetante ompö pich cho poryeghenanïn!

² Sörwante ompö pich cho ighöy ghöyityö aisörwante achïwïta pïchoni le pörï!

³ Mi chane kusyepanïn atökïparanïn! Ketuyö kegh pkatis atökïporyeghenanïn amelö ompö lelutyenyan anta ngokï cho kaghan, we ECHOTYON.

⁴ Möminye kïgh nyo kalelan, wölo katat chane kïporyeghanïn. Nyonö, we ECHOTYON, aingarakante!

⁵ Ngeta, we ECHOTYON, Tororöt Kimuktoghin, Tororöt pö Israel! Nyonö tönö sitöt punton löwïr, mesyonchï mwokïyis cho tötöy ghöyityö!

⁶ Pkonöy chane ato le asïna akupkongsïyi le kukïdin cho rimöy kanasyan.

⁷ Tera ngalekwa cho oröre, lata ngölyepkökwa chokon, akïlenchini kegh möminye chi nyo lïmöy chane.

⁸ Wölo iroröchinenyi chane, we ECHOTYON, inyereronyi punton aisas.

⁹ Osölinyi, we owesyenyu, ichinyi, we Tororöt, ghïpöwontenyan.

¹⁰ Tuyot nko ani Tororötïnyan ompö chomnyenyi nyo pö kokay. Akwighanïn asïwa punkachu ato kïrïntoy.

¹¹ Mepar chane, we Echotyon, atömöwutyeghö piköchan. Toyenö chane ompö owesyengu airïnta, we Echotyon, nyo ichï longencha.

¹² Nya kïlïkwï ngöghöp menotönengwa, kïrïp kegh nko ngokiko kutïwekwa! Chïpisïyi chane akïmwoghöy putintön,

¹³ iwany chane ompö nörekyengu iwany chane lömïs! Atökunkïtï pich löwïr lö pöytoy Tororöt pipö Israel akïghömï paytaghtanyi ngwïny kïmïkul.

¹⁴ Pkonöy chane ato le asïna akupkongsïyi le kukïdin cho rïmöy kanasyan

¹⁵ Kïyöröy omisyewut, ato möpïghyöcha, kïmororyö.

¹⁶ Wölo osölan owesyengu, otumchinan tökwoghö chomnyengu nyo pö kokay, ompöwölo ichinyi ghïpöwontenyan ompö osiswo kömpölelut.

¹⁷ Osölinyi, we Owesyenyu, ichinyi, we Tororöt, ghïpöwontenyan, Tororöt nyo porwanïn chomnyenyi nyo pö kokay. Ompö kintöghoghinto tumï. Kïrïp kegh nko tum pö “Tapïkoy pö söwintön.” Tum pö Daudi nyo pö kinetut, otini kiporyeghö pipö Aram cho pkono Naarayim nko Sopa nko atay kipar Yoa pipö Edom 12,000 ompö mpöghoghyo Partin.