TUMWÖY 48 - PIPÏLIA

¹ Wow ECHOTYON akïmïchini kesal tya ompö kanasyanta Tororötïncha.

² Kogh akï pïchigh Sayon,* kutïng pö Tororöt nyo mi okumpö löt. Ipchini kanasyanta pöytoghin pipö ngwïny kïmïkul ngörekyö nyo wow. Lata Sayon kutïng pö Sapon parak.

³ Kakuporï Tororöt lö tïghume ori nayatu kanasyan.

⁴ Kighamït kegh pöytoghï akïpka kïporyeghö kutïng pö Sayon.

⁵ Otini kisïwa chane kanasyantanoni kïtangany akïkwongkwongisyö akupertoy.

⁶ Kipotonchö chane akutor kïwoyö le korka nyo lusïyi

⁷ Kinyaranyi chane le melino Tarsis ompö nanam, cho köryöp kuriy yomöt nyo ngwïno kongasis.

⁸ Kakïsïwecha tïkwïn cho kikïlïmacha ompö kanasyanta ECHOTYON Kimuktoghin, Tororötïncha, nyo komönöy nyinte kokay.

⁹ Kinonecha chomnyengu nyo pö kokay, we Tororöt, otini kïmitecha Kongu.

¹⁰ Salate kaynengu ompö wop tïkwïl, we Tororöt, ichinyi oror ompö ngwïny kïmïkul, akepaytenyi ompö man.

¹¹ Nya kïngörekyö pipö Sayon! Imutenyi ngal ompö man nya kïngörekyö pipö kanastina Yuda!

¹² Atanga Sayon, ape awitwita, oyitö kïtartinechi.

¹³ Arosa nöyetwechi nko kïtartinechi, tomwochinö pïnwöy cho pkonöy lö,

¹⁴ “Tororötïncha nyete kokay nko kokay. Lïku kintöghoghintencha nyinte kokay!” Ompö kintöghoghinto. Tum pö werpö Kora.