TUMWÖY 46 - PIPÏLIA

¹ Tororöt nyo le ghïpöwontencha akï owesyencha, kingörokin nyo lekït ompö osiswo nyarïl.

² Kïlenyona, mökiwöghechanye kïgh, kïrkegh kapotan ngwïnya akïchïnchini kutïngkotï nanam ngwïny.

³ Kïrkegh keghum nanamtina akïwasawas kegh akïpotonchö kutïngkotï ompö kiteghat.

⁴ Mi lalwa nyo ipchini kanasyanta Tororöt ngörekyö, wölo tïlil möngöy nyo Töror Tya.

⁵ Mito Tororöt kanasyantanoni amemukonye ntöketimtim, ngwïnöy Tororöt kungöroköy otini le kiwasan.

⁶ Mïghyot puntonï akïpotonchö pöyunötinö, wölo kötïl Tororöt kunyit ngwïnya.

⁷ Mi ECHOTYON Kimuktoghin nko acha, Tororöt pö Yakopo nyo le köpönencha.

⁸ Apkana asïwena ighisyewut pö ECHOTYON atasïwena tïpö otyogh cho kigh nyinte ompö ngwïnyinï.

⁹ Wongöy nyinte poryotïn ompö ngwïny kïmïkul akïrïng kïwantis nko ngötwö akïpel longoy.

¹⁰ Lentöy nyinte, “Osisyenö ankïtï lö, ochan Tororöt! Osïkonan ororyö punton löwïr, osïkonan ororyö ngwïny kïmïkul!”

¹¹ Mi ECHOTYON Kimuktoghin nko acha, Tororöt pö Yakopo nyo le köpönencha. Ompö kintöghoghinto tumï. Tum pö werpö Kora.