TUMWÖY 45 - PIPÏLIA

¹ Kinyïghï mïkulöwunyan kinonut cho karamach, otini otumchinan pöytoghin. Lata ngalyapunyan kalamu kikirin nyo ngöghom.

² Ichinyi pïchigh kïtïl pich löwïr, tïng kutingu pöropchö, kikusoyöninyi Tororöt kokay.

³ Rötinö kamasungu chokengu, we nyakan, itïngetenyi ororyö nko wowïn.

⁴ Leta tagh ompö wowïntöngu aterïntena atenoghyechinö kirwoko kisyonchin nko man ipu owesyengu rïntaghtin cho echön.

⁵ Ngötipöch kotiku wutöy punköku kurel mïkulis, pïtyini koroswö kelyeku.

⁶ Töpo paytaghtangu nyo kökoninyi Tororöt kokay. Ipöytonenyi piköku ompö man.

⁷ Ichömenyi man aitöghenyi ghöyityö. Kïlenyona kakïlïnyi Tororöt, Tororötïngu akïsyolinyi kïtïl pöytoghï walaka löwïr akïmïlchinyi ngörekyö le mwagh.

⁸ Ngutegho sïroköku löwïr sikaka nyo karam, ingörökenyi ompö pïkantis cho pö tumï cho tumunyi ompö korïn cho kikïmina kela pelöw.

⁹ Kor walaka cho mi katangu kï tipö pöytoghï, kughyongo koko pöytoghin ewungu nyo pö tagh nyo kimina kegh kari koltin cho pïchighöch.

¹⁰ Tera we chepï, ailïm! Wutyeghenö ye piköku nko koto papongu.

¹¹ Ighöy pïchighyengu pöytoghin kïpïrchinyi, echotyontengu nyinte, mïchininyi terchinö nyinte.

¹² Ipunyi ropöw pipö Tiro, pïrchini sïkön kïchömeninyi kegh.

¹³ Kölïtï chepö pöytoghin nyo pïchigh lö ne nya! Kikïsïlö sïrokachi koltin.

¹⁴ Kakimïtyï nyinte pöytoghin, loköy sïra nyo kikïsïl, kïrïpöy tipö kensyö nyinte.

¹⁵ Kïpa chane ompö ngörekyö nko turönöt akïlïtöy kö pö pöytoghin.

¹⁶ Pöytoy moneku kukeröy papotïneku. Ighenyi chane kïpöyu ngwïny kïmïkul.

¹⁷ Oghan kaynatengu kenonöy ompö pïnwöy löwïr, sölinyi nyu puntonï kokay nko kokay. Ompö kintöghoghinto tum pö werpö Kora. Kïrïp kegh nko tum pö tipïn. Tum.