TUMWÖY 44 - PIPÏLIA

¹ Kakelïmacha achane ompö yiticha, we Tororöt, kimwowecha papotïnecha ighisyewut cho kighanyi ompö osiswekwa otini le könyisyok.

² Kiyontenyi pipö punton, wölo itönönyi korengwa papotïnecha Kichoptenyi kong pipö punton walaka aighanyi piköku kulet akïsïch tïkwïn.

³ Melö kirïntegha piköku owesyeto chokonikwa amelö kirïnta chane ompö owesyengwa kegh. Kirïnta chane ompö owesyengu akinkït lö, kimitenyi tïkwïl, ompöwölo kichamanyi chane.

⁴ Ichinyi pöytoghintenyan aichï Tororötïnyan nyo itöni rïntagh piköku.

⁵ Kïrïnteghocha pungköcho owesyengu, owöy, kïtïkotïkecha chane ompö kaynatengu.

⁶ Melö otwoytonan kegh kïwantinyu amelö sörwanïn chokenyan,

⁷ wölo nyi nyo kesörunenecha pungköcho aikwangkwanganyi cho reyecha.

⁸ Kïsölichanyi kïtenö osis, we Tororöt, kiyokucha nyi sörö kokay.

⁹ Wölo kewirtechanyi ye aikany kerïntecha, amelö tesetenyi lïk nko acha.

¹⁰ Keghechanyi keryaghena pungköcha, kïnyorï chane pöröw.

¹¹ Kepïstechanyi keyengecha le kechir, ketoyechanyi keghömunö punton.

¹² Kyaltenyi piköku kegh ompö olyot nyo le kite amelö kinyorunyi tösöw ompö altaghnoni.

¹³ Sïwïyi pörörisköcha tïkuchoni kighanyi, sösecha chane akïroröchecha.

¹⁴ Kangemecha pipö punton, kenyernyerecha chane.

¹⁵ Ololïyönan kïtenö osis, kelum arasï tokochunyan

¹⁶ ompö nyerererat nko sasat nyo konyorchan punkachu nko cho tökisïyi.

¹⁷ Ketwecha ngalechoni, kïrkegh tomönye kewutyeghenöcha nyi anta kïtagh kerïp mumengu.

¹⁸ Tomönye ompö kepenyacha ngölyontengu akïtomönye kepïstenöcha orengu.

¹⁹ Wölo kepïsyechanyi tapan kwenu tyompö wudïn, kepïsyechanyi tuwïn nyo wow.

²⁰ Ntökikïpïstecha kesagha Tororötïnyo akesagh tororötin walaka,

²¹ kötökenkïtunyi kïyoni, we Tororöt, ompöwölo inkïtönyi kinonutköcha cho wïngote.

²² Wölo kakïparecha kïtenö osis akwompö nyi, kakighecha le kechir cho kïyengöy.

²³ Ngeta, we Echotyon, kölö ne terïwenyi? Kaykay ngeta, mewirtecha kokay.

²⁴ Kölö ne tewïnganyi kegh ompö acha aiwutyeghö kiwongunötencha nko pïröt?

²⁵ Kakïwirecha kelïkuna kot, mökemukechanye kengetyene.

²⁶ Ngeta atenyonö ngarakecha. Sörwecha ompö chomnyengu nyo pö kokay. Ompö kintöghoghinto tumï. Kïrïp kegh nko tum pö tapïkoy. Tum pö werpö Kora, tum pö chomnyogh.