TUMWÖY 41 - PIPÏLIA

¹ Soyönote chi nyo syonchini mey, söru ECHOTYON chane osiswo kömpölelyö.

² Ripöy ECHOTYON akïkaman kïsöp, ighöy nyinte kïngarak ompö kor, melö töni nyinte mori pungkachi.

³ Ngöroköy ECHOTYON nyinte otini mi kösotyö akusop.

⁴ Olan, “Kyawunyi ngokï, we ECHOTYON, syonchante aisopo.”

⁵ Mwoghöy pungköchan ngal cho ghach ompö ani lö, “Meghöy oyï atökewutyeghö.”

⁶ Rutoghwanïn chepölköstinechoni akïngalan nyo karam, wölo ngölonenanïn nyo gha ompö sany.

⁷ Chomanïn pich löwïr cho reyanïn akunonchinanïn ngal cho ghach.

⁸ Mwoghöy lö, “Kanam sömewö nyo gha, amökïngetunonye pöröy ngat!”

⁹ Mwoghöy lenyoni kongenyan nyo kotwoytonan kegh, kawaghaka kïporyeghenanïn nyini kyomisïyan tïkwïl!

¹⁰ Wölo syonchante, we ECHOTYON aisopo, atotökyan chane ghöyityengwa.

¹¹ Ato ighanyi lenyoni onkïtwan lö, ichömaninyi akï mökïtïngcha pungköchan owesyö.

¹² Ingörokaninyi, ompö mantanyan, itönaninyi otöpan nko nyi kokay.

¹³ Nya kïsala ECHOTYON Tororöt pö Israel. Asala nyinte kïngata ye nko kokay! Amen! Amen!* Ompö kintöghoghinto tumï. Tum pö werpö Kora.