TUMWÖY 37 - PIPÏLIA

¹ Mesus kegh ompö mwokïyis amesïch nyonyintön ompö pich cho ghach.

² Tomönye kite kuwonyö le sus akïrörochö le sökö.

³ Ghana ECHOTYON aigh nyo karam atemanga kor ompö kalya.

⁴ Ngörökyinö ECHOTYON atökïkonïn machateto mïkulöwungu.

⁵ Tönö ECHOTYON söpontöngu, ghana nyinte atökungarakïn.

⁶ Ighöy kirwokutköku kïrumï le löpoyïn, akwigh mantangu kulïwï le pöghet.

⁷ Sisa nyu ompö tawu ECHOTYON aikön nyinte. Mesus kegh ompö pich cho mökosöch anta tötoy wököt.

⁸ Mepïsyï nörekyö anta sïnyoryö, mesus kegh, ompöwölo ipu ghöyityö.

⁹ Kipïstoy mwokïyis, wölo nyoru pich cho könöy ECHOTYON kor.

¹⁰ Tomönye kite melö tökïmi mwokïyis, kïrkegh yaranyi wölini kömi kïmenyorunenyinye.

¹¹ Nyoru pich cho tölose kor akïngörökyï pöghisyö.

¹² Wököy mwokïyis chi pö man akïnyöghchï kelat,

¹³ wölo roröchini Echotyon mwokïyis, ompöwölo nkït lö ngörï osiswekwa.

¹⁴ Ngwïsöy mwokïyis chokonikwa akïnyigh kïwantiskökwa atökïpar mey nko somï, lö tökewanya cho ighöy man.

¹⁵ Lyoköy chokonikwa chane akïmïrisyö kïwantiskökwa.

¹⁶ Ngwangwa meywontöno chi pö man kïtïl mökosyo mwokïyis.

¹⁷ Ompöwölo nyoröy ECHOTYON owesyo mwokïyis, wölo riptoy nyinte pipö man.

¹⁸ Komönöy ECHOTYON pipö man akïngötu mïlatengwa kokay.

¹⁹ Melö wongu chane ato itï osiswo pekat, ngötini omisyewut osiswo kömöy.

²⁰ Meghsot mwokïyis, silonchot pung pö ECHOTYON le tapïkoy, weröy chane le kapuret.

²¹ Pösönöy mwokïyis tïpö pich amöghokucha, wölo pögho chi pö man tïkuchi pich.

²² Mïlöy pich cho kakusoyön ECHOTYON kor, wölo kïpïstoy pich cho kikïchïp nyinte.

²³ Ato ngörökyini ECHOTYON otöpö chi pö man, kuntöghoghchini pantanyi.

²⁴ Ato pïtyö kïtökïngetsot, ompöwölo ighöy ECHOTYON chane kïnget.

²⁵ Kyochan chumwak akyalïkwan ye poyon, wölo tomönye asïwan chi pö man kïwirta ECHOTYON anta monechi cho somotoy omisyö.

²⁶ Pöghöy pich kïnomnyö akïpösöntoy tïkuchi, ipu monechi kisoyönöt.

²⁷ Pïstenö ghöyityö aigh nyo karam, atengötunö kokay,

²⁸ ompöwölo chömöy ECHOTYON man, amöpïstonye pikachi. Komönöy pipö man kokay, wölo pïstoy monïngo mwokïyis.

²⁹ Mïlöy pipö man kor akïmang wölini kokay.

³⁰ Ngölonöy kuti chi pö man ngöghomnyö akïmwoghöy ngalyapunyi.

³¹ Komöno mïkulöwunyi kirurut pö Tororötïnyi amelö chitöy kelyechi.

³² Söpchini mwokïyis chi pö man atökumukyï kïpar.

³³ Wölo melö pïsyini ECHOTYON nyinte morikwa anta cham kurwokyï nyinte ompö kigheghchin.

³⁴ Könö ECHOTYON airip kirurutkachi atökïkonyïtïn nyinte akïkonïn kor, atesïwena lö kitulöy mwokïyis.

³⁵ Kyasïwan mwokïyis cho kikwol kegh nyoman, kip kegh parak le törokwo Lepanon!

³⁶ Ato mi ato le soya kite aweran atoni, kimasïwanye. Olan ayar, wölo melö kitökïmi.

³⁷ Iros chi nyo karam nko chi pö man, nyoru chi pö pöghisyö perur,

³⁸ wölo kinyoröy mwokïyis lömïs akepïstö piko arengwa.

³⁹ Söru ECHOTYON chi pö man, ghïpo chane ompö nyinte osiswo nyarïl.

⁴⁰ Ngöroköy akïsöru chane, söruno ewuno mwokïyis, ompöwölo ghïpo chane nyinte. Tum pö Daudi, rirat.