TUMWÖY 36 - PIPÏLIA

¹ Ngölonöy ngokï nko mwokïyon ompö mïkulöwunyi ori, töghöy nyinte Tororöt amökonyïtönye.

² Kwolöy kegh nyinte, ntömökïsïwïyinye ngokichi amökïghöchininye.

³ Pö putintön nko ghöyityö ngalechi löwïr, melö tökïmöko kïgh ngöghomnyö anta köromnyö.

⁴ Nonöy ghöyityö otini rïwöy, möminye kïgh nyo karam nyo ighöy, amötöghonye kïgh nyo gha.

Köromnyo Tororöt

⁵ Itöy chomnyengu nyo pö kokay yïm, we ECHOTYON, aketwoytoninyi kegh ntökwit poltoy.

⁶ Karkegh mantangu nko kutïngkoti Tororöt, karkegh kirwokutköku nko koghïn cho pö nanam, ikomönenyi pich nko tyonkïn, we ECHOTYON.

⁷ Pö olyot nyo wow chomnyengu nyo pö kokay, we Tororöt! Ghïpchegho ptangengmötin köpepoköku.

⁸ Omo kongu ichontöngwa nyo mewonyot, itönenyi kïghegha pögh lalwengu nyo pö ngörekyö.

⁹ Ichinyi towunöto söpon, kïsïwïyecha löpoyïn ompö löpoyïntöngu.

¹⁰ Itas tagh nko chomnyengu nyo pö kokay ompö chane cho nkïtinyi aisörï pich cho tenote.

¹¹ Mepïsyï menot kïtyakatanïn anta ipïsyï mwokïyis kïyonanïn.

¹² Kiruyö mwokïyis ngwïny, kurïnkïsus amökumuköcha kïngetöy. Tum pö Daudi.