TUMWÖY 34 - PIPÏLIA

¹ Oyokyinan ECHOTYON sörö kïtenö osis. Sölöy ngalyapunyan nyinte kokay.

² Kwolöy kegh söpontönyan ompö ECHOTYON, nya kïlïm cho mi nyarïl atökïngörekyö.

³ Kekusa ECHOTYON nko ani aketor tïkwïl kaynenyi.

⁴ Kyasaghan ECHOTYON, kïwöghökwï. Kityakenanïn kiwaghat anka tïkwïl.

⁵ Rosa nyinte, atonyorunö ngörekyö, melö tonyorunekwa arasï kokay.

⁶ Kyomitan nyarïl, orirchan ECHOTYON, kïterwanïn, kïsörunenanïn nyinte kömpölelutköchan löwïr.

⁷ Ripöy malaykayanta ECHOTYON pich löwïr cho konyïtöy nyinte akïsöru chane.

⁸ Achamchama akwane atasïwena köromnyo ECHOTYON. Soyönote chi nyo ghïpo nyinte.

⁹ Okonyïtö ECHOTYON cho ochï pikachi, nyoru möchutkökwa löwïr cho konyïtöy nyinte.

¹⁰ Rörchini ngötuny omisyewut akwam kömöy, wölo melö mi kïgh nyo karam nyo rörchini chane cho soghöy Tororöt.

¹¹ Apkana monïngö ater ngalechan, atanetakwa wölo kïkonyïtïtoy ECHOTYON.

¹² Ngo nyo mököy kïngörökyï söpon akïmököy kïmöngisyö nyo kogh, akï ngörökyï tïkwïn cho karamach nya?

¹³ Nya kïrip chichoni ngalyapunyi mamwa ghöyityö akïkïrö kutinyi putintön.

¹⁴ Lowitunö ompö ghöyityö aigh nyo karam, yara kalya aipïrpïr ompö mïkulöwungu kïmïkul.

¹⁵ Komönöy ECHOTYON pipö man akïköp yitichi ompö riratengwa.

¹⁶ Wölo pkongöy nyinte mwokïyis akïngongoghta kaynötutkökwa ompö ngwïny.

¹⁷ Ato rirchï pipö man ECHOTYON, lïmöy akïsörunö chane kömpölelutkökwa löwïr.

¹⁸ Lekïtö ECHOTYON pich cho kimeghö mutïnö, söru nyinte chane cho mötïngcha kikönöt.

¹⁹ Nyoru chi pö man nyörilwok cho chang, wölo söruno ECHOTYON nyinte choni löwïr.

²⁰ Ripöy ECHOTYON nyinte lasiny, möminye kowenyi nyo mïro.

²¹ Pöröy ghöyityö mwokïyis akerwokyini cho reyöy chi pö man.

²² Söru ECHOTYON mötworichi amelö kirwokyini cho ghïpo nyinte. Tum pö Daudi.