TUMWÖY 33 - PIPÏLIA

¹ Ongörekyinö ECHOTYON, akwa pipö man. Mïchini pich cho tenote kïsal nyinte.

² Asala ECHOTYON ompö pkurerun, otumchinö nyinte ompö pïkan.

³ Otumchinö nyinte tum nyo rel, opïtö pïkantis lasiny ateghyö ompö ngörekyö.

⁴ Pö man ngölyonto ECHOTYON akemuköy ketwoytoy kegh ighisyewutkachi löwïr.

⁵ Chömöy man nko kirwok nyo tenate, kighömï chomnyo ECHOTYON nyo pö kokay ngwïny.

⁶ Kikigha ngölyonto ECHOTYON yïmwöy, kikigh tïkwïn löwïr cho mi oringwa ompö kimïnytanyi.

⁷ Kitö pögho nanam söt akutö mirtino pögh töpoton.

⁸ Nya kuwagh ngwïnya kïmïkul ECHOTYON! Nya kïkonyït pipö ngwïny kïmïkul nyinte!

⁹ Nyini kingalan nyinte, kwigha akwotini kimwa nyinte kïgh, kïrumï.

¹⁰ Nyoröy ECHOTYON tötut pö punton akïkwanykwany kinonutkökwa.

¹¹ Tïpisot tötut pö ECHOTYON kokay akïmito ngalechi ompö pïnwöy löwïr.

¹² Soyönote puntonï cho ECHOTYON kï Tororötïngwa, pich cho kikïl Tororöt kïlïkwï chechi!

¹³ Topönöy ECHOTYON ngwïny ompö yïm, sïwïyi pipö ngwïny kïmïkul.

¹⁴ Rosuno nyinte ngacharunyi nyo pö paytagh, sïwïyi ptangengmötin löwïr cho möngöy ngwïny,

¹⁵ nyinte nyo ighöy kinonut pö pich löwïr, nkït nyinte kïgh anka tïkwïl nyo ighöy chane.

¹⁶ Melö rïntoy pöytoghintö ompö lïkenyi nyo wow, akï melö pölisïyi nyakana ompö owesyenyi nyo wow.

¹⁷ Möminye kïgh nyo nyiwu angole ompö osiswo tapan, melö söru kïgh owesyenyi nyo wow.

¹⁸ Komönöy ECHOTYON chane cho konyïtöy nyinte, pich cho twoytoy kegh chomnyenyi nyo pö kokay,

¹⁹ atökïsörunö söpontöngwa meghat akïpagh chane osiswo kömöy.

²⁰ Kikönecha ECHOTYON, nyinte nyo ngörokecha akï longencha.

²¹ Kïmitecha keturonchot ompö nyinte, kitwoytocha kegh kaynenyi nyo tïlil.

²² We ECHOTYON, nya kïtöpö chomnyengu nyo pö kokay nko acha otini kïmitecha keköninyi.