TUMWÖY 32 - PIPÏLIA

¹ Soyönote chi nyo kakelöstoghchï ngokichi akikengongoghta lelutkachi.

² Soyönote chi nyo melö tökuyitini ECHOTYON lelut, chi nyo melö tökïtïng lïsat ompö ngalyapunyi.

³ Kyaghachan lönyïl kwimön ompö lokat, otini kitomönye anganytan ngokichu.

⁴ Kitunganïn ewungu pöghet nko nangat, we ECHOTYON, kiteny owesyenyan le pögh ompö osiswo pekat.

⁵ Kyongongunyi ngokichan amelö kyawïngan ghöyityenyan. Kyasïwan lö, mïchini ongongunyi lelutköchan, ichamanyi löstoghwanïn ngokichan.

⁶ Kïlenyona mïchini kïsaghinyi piköku ompö osiswo kömpölelyö. Nyo ato itï puseryonto kömpölelyö, kïmelö chutöy chane.

⁷ Ichinyi wölo oghïponan, isörwaninyi ompö osiswo kömpölelyö, oserönan tya ompö sörunötengu, ompöwölo iripenaninyi tapan.

⁸ Lentöy ECHOTYON, “Oporunyi or nyo irïpenyi. Orurinyi akamaninyi.

⁹ Melïkwï sölwö le angole anta sïkïryö cho mötïng pköchin, cho mököy kïnayan nko angwa kiretegho atökïlïm ngal.”

¹⁰ Nyoru mwokïyis nyörilwok cho chang, wölo witöy chomnyo kokay nyinte nyo twoytoy kegh ECHOTYON.

¹¹ Ongörekyenö ompö ECHOTYON, oturonchö cho ochï pipö man. Otumö ompö ngörekyö, akwa löwïr cho ochï tenote ompö mïkulögh.