TUMWÖY 27 - PIPÏLIA

¹ ECHOTYON kï Löpoyïntönyan akï sörunötenyan, ngo anka nyo owöghan? ECHOTYON kï ripintenyan. Ngo nyo otyeghonanïn?

² Ato yonanïn mwokïyis kïmach kïparanïn, anta pka pungköchan kïporyeghenanïn, wölo chane cho wiröy kogh akupïtyö.

³ Kïrkegh kerikanïn söpïchtö kïmïkul, kïmowöghanye, kïrkegh köporyeghenanïn pung, kïmonyökoritunanye.

⁴ Kyatepan ECHOTYON kïgh akonga, lö omökan tamangan Konyi, osiswechan löwïr. Atasïwan pïchighyo ECHOTYON, atepan nyinte kulïwchï orenyan.

⁵ Wïnchinanïn nyinte konyi ompö asispa nyarïl, lumanïn ompö wölo tïghume akïsïtyanïn ghat parak.

⁶ Osyolan möt ompö ngörekyo rïntagh ompö pungköchan cho mi kuwitanïn atöninan amörostino ngörekyö, otumchinan ECHOTYON sölut ompö konyi.

⁷ Terwante, we, ECHOTYON, ato olokyinyi! Isïch kisyonöt aiyokwante sowutkachu.

⁸ Atakinye kilenyi, “Nyonö saghanïn.” Oyokunyi lö, “Ongwïnan, we ECHOTYON.

⁹ Mewïnga kegh wölo omitan!” Meyoda mötworintengu ompö nörekyö, nyi nyo ichï kingörokintenyan. Mepïstante anta itaghanïn, we Tororöt pö sörunötenyan.

¹⁰ Kipïstanïn paponyan nko yonyan, wölo ngörokanïn ECHOTYON.

¹¹ Netante arengu, we ECHOTYON aimïtante or nyo motyonanïnye kamas, ompöwölo reyanïn pung.

¹² Mepïsyï machata pungköchan kwigha ompö ani, cho söwintönchinanïn ompö putintön, akumonöy kïpöranïn.

¹³ Oghönan lö osïwïyan köromnyo ECHOTYON ato towestonan.

¹⁴ Könö ECHOTYON aisïch kighanat, mekany kïmeghïn mu, owöy, könö ECHOTYON. Tum pö Daudi.