TUMWÖY 25 - PIPÏLIA

¹ Nyi, we ECHOTYON, nyo osoghinyi,

² nyi, we Tororötïnyu, nyo oghönan. Mepïstanïn onyorwan arasï, mepïsyï pungköchan kïroröchanïn!

³ Mekany kïnyorï arasï pich cho ghöninyi, kïpoto cho töghinyi ompö kwötyin.

⁴ Netante ortïneku, we ECHOTYON, aikany onkïtwan wölo töngöy.

⁵ Netante otöpan kïrïp kegh nko mantangu, ompöwölo ichinyi Tororöt pö sörunötenyan. Oghöninyi osis löwïr.

⁶ Inan, we ECHOTYON, kisyonötengu nko chomnyengu nyo pö kokay cho kimi kïngata könyisyok.

⁷ Menan, we ECHOTYON, ngokichan nko penyatenyan cho kipö chumwaknan. Inanante ompö chomnyengu nyo pö kokay ompö köromnyengu, we ECHOTYON!

⁸ Karam ECHOTYON akutenate, nka nyini netöy nyinte mwokïyis ortïnechi.

⁹ Ntöghoghchini cho tölose kïrïp orenyi akunetöy nyinte chane machatenyi.

¹⁰ Chomnyo kokay kï ortïna ECHOTYON cho twoytoy kegh pich cho rïpöy mumenyi nko kirurutkachi.

¹¹ Löstewante ngokichu, cho möngörï ompö kaynengu kegh we ECHOTYON.

¹² Chi nyo konyïtöy ECHOTYON, kuporchini nyinte or nyo mïchini kïrïp.

¹³ Nyoru chichoni perur akïmïlöy monechi kor.

¹⁴ Nömöy ECHOTYON kongot nko pich cho konyïtöy nyinte akuporchini chane mumenyi.

¹⁵ Orosan ECHOTYON kïnomnyö tökungarakanïn achïwïtan ngöghöp.

¹⁶ Pörunö wölï, we ECHOTYON, aisyonchante, ompöwölo kyowongwan onkït.

¹⁷ Chenga kisusutko mïkulöwunyan, sörwante atachïwïta kömpölelutkachu.

¹⁸ Sïwena nyarïltanyan nko kiwongunötenyan ailöstewante ngokichu löwïr.

¹⁹ Sïwene köny chongïnto pungköchan, sïwene köny wölo reytonanïn chane.

²⁰ Ripante aisörwante, tömonyorwan arasï, ompöwölo nyi nyo oghïponan.

²¹ Nya kïrïpanïn kitenatenyan nko mantanyan, ompöwölo oghöninyi.

²² Isörunö piköku Israel kömpölelutkökwa, we Tororöt! Tum pö Daudi.