TUMWÖY 21 - PIPÏLIA

¹ Ngörököy pöytoghintö, ompö owesyengu, we ECHOTYON. Turönöy ompö kingörokutyengu.

² Ketönönyi nyinte machata mïkulöwunyi amelö ketaghenyi nyinte somötenyi.

³ Kirutochinyi nyinte ompö kisoyönot nyo wow ailokyinyi mötïnyi tenta nyo pö koltin cho pïchighöch

⁴ Kisominyi nyinte söpon, itönönyi, itönönyi osis cho puryö söröm.

⁵ Kitasa ororyenyi, ompöwölo kingarakanyi nyinte, keghanyi nyinte kwororit akïghetï.

⁶ Mito kisoyönutköku nko nyinte kokay aighanyi kïngarak, ompöwölo imitenyi tïkwïl.

⁷ Twoytoy kegh pöytoghintö ECHOTYON, möminye kïgh nyo swongöy nyinte akwompö chomnyo kokay nyo pö Tororöt nyo Töror Tya.

⁸ Nömöy pöytoghintö pungkachi löwïr, nömöy anka tïkwïl nyo reyöy nyinte.

⁹ Wuröy chane le lyopöto ma otini ketï. Wongöy ECHOTYON chane ompö nörekyenyi akïpel lömïs.

¹⁰ Möminye nyo le ompö akonga nyo pö arengwa nyo ngötu, pöröy pöytoghintö chane löwïr.

¹¹ Kïrkegh katat kwighchï nyinte ghöyityö, kïmemuköcha ntökïpïntö ngalekwa.

¹² Wuto nyinte chane kotï, akwigh kïryögh.

¹³ Kïsölichanyi, we ECHOTYON, ompö owesyengu nyo wow! Kïtumecha akesal owesyengu. Ompö kintöghoghinto tumï. Kïrïp kegh nko tum pö “Cheptirkich pö kiwasan.” Tum pö Daudi.