TUMWÖY 19 - PIPÏLIA

¹ Mwowu wölnö le yïm ororyo Tororöt! Mwotïtoy ompö mïröt ighisyewutkachi!

² Mwochini pöghetï pöghetu anka ngalechoni, kïmwochï oghö oghe anka pköchin.

³ Möminye ngalanata anta ngal, mökïlïmönye kutïwekwa

⁴ akwanyï kïlïmo kutingwa ngwïny kïmïkul akelïmo ngale söremwok pö ngwïny. Kighchï Tororöt asis möngenyi mïröt.

⁵ Pusu tökwoghö le chi pö mïrar nyo ngwïno konyi lata chumwak nyo chömöy kurïpöy.

⁶ Pusuno sörömu anka nyo pö yïm akïröytö sörömu anka, möminye kïgh nyo wïnyo kegh kilayatenyi.

Kirurut pö ECHOTYON

⁷ Tenote kirurut pö ECHOTYON, lölongöy söpon. Ghanate machata ECHOTYON, töni ngöghomnyö sölwö.

⁸ Pö man kinetut pö ECHOTYON, töni mïkulögh kïturön. Tïlilöch ngala ECHOTYON, töni löpoyïn konyïn.

⁹ Kïlït ngölyonto ECHOTYON, töpo kokay. Pö man ortïna ECHOTYON akutenote löwïr.

¹⁰ Pö pïrchin kïtïl koltin, kïtïl koltin cho pïchighöch. Onyïnech kïtïl kumat, kïtïl kumat nyo yinuno yiti möghen.

¹¹ Töni mötworintengu chïreryö. Nyinte nyo rïpöy kïnyoru ropöwon.

¹² Ngo nyo muköy ntökïsïwa lelutkachi? Sörunenante ngokï cho wïngote, we ECHOTYON!

¹³ Ilowitante ompö ngoki kwötyin, amepïsyï kïpaytanïn ngokichoni. Atamukan nyu alïkwï chi nyo tenate aketyakan ompö ngokï cho ghach.

¹⁴ Icham ngaleko kutinyan nko kinonutko mïkulöwunyan, we ECHOTYON nyo ichï köpönenyan aichï sörunintenyan. Ompö kintöghoghinto tumï. Tum pö Daudi.