TUMWÖY 18 - PIPÏLIA

¹ Ochöminyi, we ECHOTYON nyi nyo ichï owesyenyan.

² ECHOTYON kï ghatyenyan akï wölo oghïponan kegh akï sörunintenyan Tororötïnyan kï ghatyenyan nyo orïpchinan. Longenyan nyinte akï owesyo sörunötenyan, pchörinyan nyinte.

³ Okuran ECHOTYON nyo mïchini kekwol, konyorwan sörunöt ompö pungköchan!

⁴ Kiwitanïn pörköyi meghat, kilumanïn puseryonto ngwen.

⁵ Kiratanïn pörköyi ngwen, kutö pïrïm ngöghöpunyi psach ompö ani.

⁶ Okurön ECHOTYON ompö nyarïltanyan, orirchan Tororötïnyan kungarakanïn. Kïlïm nyinte kutinyan ompö Konyi, kit lokechan yitichi.

⁷ Kïpotan ngwïnya akuyotyot, kipotonchö pchörino kutïngkot akurïngring, ompöwölo kinyala Tororöt.

⁸ Kipusta ighöt nyo kingwïna sörunöyichi, kungwïna lyopötö nyo ngwan kutinyi, kingwïtu ngöset cho nöghyot.

⁹ Kupun yïmwöy akungwïn ngwïny akimi polta nyo tuw kelyechi.

¹⁰ Kilang nyinte kerupim* akupiltö, kungwïna lawel köpepoy pö yomöt.

¹¹ Kuyenö kegh tuwïn, kuwit poltoy nyinte cho kinyïghï pögh.

¹² Kïropönï takarïs nko ngöset ompö kiryal nyo kimi tawunyi kurelunö poltoy cho tïwöch.

¹³ Kïtïl ECHOTYON ompö yïm, kelïm kuti Tororöt nyo Töror Tya.

¹⁴ Kïwutïtö kotichi kutoyö chane, kïyon chane ompö kiryal, kupertoy.

¹⁵ Kïrumï ngwïnya nyo pö nanam kengany kitoröto ngwïny, otini kisyalanyi, we ECHOTYON, otini kitorunö kimungöt sörunöyichi.

¹⁶ Kingwïna ECHOTYON yïm akïnamanïn, kingwïsunenanïn nyinte ngwïnyi pögh.

¹⁷ Kïsörunenanïn pungköchan cho owesöch, chane cho kireyanïn, owesöch chane tya ompö ani.

¹⁸ Kipokyanïn chane ato kyomitan nyarïl, wölo kungarakanïn ECHOTYON.

¹⁹ Kingarakanïn nyinte, kisörwanïn, ompöwölo kichömanïn.

²⁰ Kikonanïn ECHOTYON perur, ompöwölo ochan chi pö man. Kesoyönanïn ompöwölo motïngönye lelut.

²¹ Karïpan ara ECHOTYON amelö kopïstan Tororötïnyan.

²² Karïpan ortïnechi löwïr amelö mi nyo kanateghan.

²³ Motïngetanye kigheghchin ompö nyinte, ompöwölo melö kyarikan ngokï.

²⁴ Kökonanïn ECHOTYON ropöw, kïrïp kegh nko mantanyan, nko pöropchönönenyan.

²⁵ Iporchinenyi pich cho ghönote ichinyi ghanate. Iporchinyi kitenat chane cho tenote.

²⁶ Iporchinenyi cho tïlilöch lö ichinyi tïlil, iporchinyi pkatis lö ichinyi pkatyan.

²⁷ Isörunenyi chane cho tölose, irekunenyi chane cho ipöy kegh parak.

²⁸ Ipköngenyi kitömöwontenyan, we ECHOTYON, ailöpochinenyi wölo tuw ompö ani.

²⁹ Orïntenan pungköchan ompö owesyengu anyoran nïyat cho montoy kegh.

³⁰ Pö man ara Tororöt, poru ayomistanyi lö man, longa nyinte ompö chane cho ryöghchini nyinte.

³¹ Möminye Tororöt kïpoto ECHOTYON, akï möminye köpön anka kïpoto Tororötïncha.

³² Konanïn nyinte owesyö, akwighöy ortïnechan kïkaramachitu.

³³ Kegh kelyechan kïkarkegh nko cho pö cheptirkich akutönanïn wölo sïtote.

³⁴ Kenetanïn nyinte ompö poryot atökumï ewunechan kïpöghisyeghö kïwanti sakalïm.

³⁵ Kelïkunyi longenyan nyo ripanïn akïtighanïn ewungu pö tagh, kïkonanïn kingörokutyengu owesyö.

³⁶ Kekonaninyi pöroyïn owestan amelö kachïntan.

³⁷ Kyarïpan pungköchan ntökïtenö anyaghan, kimopïstanye chane ntökïtenö aparan.

³⁸ Kyaparan chane anyaran memï kïngetyö, kyarïntan chane nyoman.

³⁹ Kinapaninyi lasiny ompö poryot aighanyi pungköchan kïpïr töronkwöy.

⁴⁰ Kighanyi pungköchan kupertegho tawunyan, kyaparan chane cho kireyanïn.

⁴¹ Kiriryö chane kengarak, wölo möminye chi nyo kisörï chane. Kilokyï chane ECHOTYON, wölo kimöterchïnye chane.

⁴² Ongoghan chane le pïsya. Kyatïkan chane le nyïngwïny cho mi or.

⁴³ Kisörunenanïn pich cho kitaghanïn aighaninyi apayta punton, kïpöghisyewanïn pich cho monkïtönye.

⁴⁴ Nyini kalïmanïn chane kïterwanïn, kïtïngchinanïn pipö koros walaka.

⁴⁵ Kimeghö mutïnö pipö punton, kïpkana nöyet cho kïkörtegho kegh akï potonchot.

⁴⁶ Söpöy ECHOTYON, soyönote köpönenyan nya kïsala Tororöt pö sörunötenyan.

⁴⁷ Tororöt nyo kökonanïn rïntagh akutö pipö punton ngwïnyinyan.

⁴⁸ Kisörunenanïn wölo mi pungköchan, kutoteghenanïn otöpan paraku pungköchan, akïghetenanïn kwenu pich cho le pkatis.

⁴⁹ Okwolinyi, we ECHOTYON, ompö kwenu punton, osölan kaynatengu.

⁵⁰ Töni Tororöt rïntagh pöytoghintenyi porchini chomnyogh pö kokay nyinte nyo kikekïl porchini Daudi nko monechi kokay. Ompö kintöghoghinto tumï. Tum pö Daudi.