TUMWÖY 17 - PIPÏLIA

¹ Terwante, we ECHOTYON, saghatenyu nyo pö man, aiterwante lokechu Ikany kïlïm yitiku saghatenyan nyo melö ngwïno kuti lïsin.

² Ikany kungwïna kirwokenyan wölo imitenyi, ikany kïsïwa konyiku kïgh nyo pö man.

³ Ato kityamanyi mïkulöwunyan, ato kingwïnchaninyi oghö, kisyakaninyi, kïmelö inyorchinaninyi machat nyo gha, momwoghonanye kutinyu putintön.

⁴ Kolowitan kegh ortïna pich cho le pkatis, ompöwölo orïpan ngaleku.

⁵ Otïkan wölo itïkenyi akïtomönye kïchityö kelyechan.

⁶ Osoghinyi ye nyu, we Tororöt, ompöwölo iterwaninyi sowutköchan. Kïlenyona iter ailïmwante ngalechu.

⁷ Porunö chomnyengu nyo pö töngönchin, nyi nyo isöru pich cho sorunyi kïryöwuno pungkökwa.

⁸ Ikamanante le kong, iwïngenante köpepoköku

⁹ atachïwïta mori mwokïyis cho pökyinanïn, pungköchan cho köromöch cho kiwitanïn.

¹⁰ Mötïngcha kisyonöt ompö mïkulöwekwa kwolöy kegh chane ompö ngalanatengwa.

¹¹ Rïpsetonanïn chane akikurikanïn ye akïmöröy pöroyïn nyo wonyenanïn.

¹² Karkegh chane nko ngötïny nyo lepisïyi akï lenye wïnwa ngötïny nyo syepsïyi.

¹³ Nyonö, we ECHOTYON, ateporyeghenö pungköchan airïnta chane, sörwante ompö chokengu achïwïta mwokïyis.

¹⁴ Sörwante we, ECHOTYON ompö pich cho le nyingwa ngwïnyinï Tönö chane sitoninö kirorchinyi chane. Nya kïnyorï chane cho mïchini monekwa akïnyorï nko moneko monekwa.

¹⁵ Wölo orosinyi ompö man, akwotini kangetan opïghyoninyi.