TUMWÖY 144 - PIPÏLIA

¹ Nya kïsala ECHOTYON nyo le köpönenyan! Nyinte nyo netanïn ngala poryot, akutöni morichan kïpsach tökïporyö.

² Köpönenyan nyinte akï wölo tekate, pchörinyan akï sörunintenyan, longenyan nyinte nyo orïpchinan, töni nyinte pich morichan.

³ Ne chi nya, we ECHOTYON, tesïngonenyi? Akï ngo ptangengmöt tenonenyi?

⁴ Karkegh nyinte nko kimïny pat, lata osiswechi puret nyo weröy.

⁵ Karera wölnö le mïröt, we ECHOTYON, airökyï ngwïny! Swanga kutïngkot atökïtorï ighöt!

⁶ Yonunö kiryal atetoyenö punköku, wutïtenö kotiku atökïyon chane kupertoy.

⁷ Ghïtenö ewungu ompö yïm atesörwante ompö puseryon atachïwïtan owesyo pipö punton

⁸ cho ngölonöy putintön, kïrkegh otini omöy muma.

⁹ Otumunyi tum nyo rel, we Tororöt, otumunyi sölut ompö pïkan.

¹⁰ Nyi nyo itöni pöytoghï rïntagh akï nyi nyo isöru mötworintengu Daudi.

¹¹ Sörwante ompö choko pungköchan aighetante ompö owesyo pipö punton cho ngölonöy putintön, kïrkegh otini omöy muma.

¹² Nya kïkarkegh karachïnecha nko simotwö, kïkarkegh tipicha nko pchörin, cho kikigh ketïngönchï cho kïmino ka pöytoghin.

¹³ Nya kïnyïghityö töpotinecha, ompö omisyö anka tïkwïl akïyiyö kechiryecha wara cho makïrar!

¹⁴ Nya kïtïsyöritu twacha akïsïch owesyö, atömechowu mogh, anta yiyö kïtomö kwitïta osiswekwa. Nya kupot makelïma rira nyarïl ortïneko kanastinecha.

¹⁵ Ngörechote pich cho nyoru kisoyönöt nyo lata nyoni akïngörechote cho nkït lö ECHOTYON kï Tororötïngwa! Tum pö salat nyo pö Daudi.