TUMWÖY 140 - PIPÏLIA

¹ Sörwante, we ECHOTYON, ompö pich cho ghach, airipenante pich cho le rïmï.

² Mito pïchoni kunonöy ghöyityö osis löwïr, akutoröy poryot kïtenö osis.

³ Karkegh ngölyepkekwa nko nyo pö moroy, akïmito kutïwekwa ngwono mïny.

⁴ Kartante, we ECHOTYON ompö ewuno mwokïyis airipenante pich cho le rïmï, cho möro kong lö tapïtan.

⁵ Köwïngchï menotï ngöghöp tawunyan akutö ptïnchïl ompö wölini oweran akïwïnchï matankïl arawet lö tökïnamanïn.

⁶ Olenchan ECHOTYON, “Ichinyi Tororötïnyan.” Terwante lokechu, we ECHOTYON!

⁷ Nyi we ECHOTYON Kimuktoghin, ichinyi sörunintenyan, kighetaninyi ompö osiswo poryot.

⁸ Metö mwokïyis tïkwïn cho mököy, amepïsï kïnyorï ghöyïn nyo katat chane.

⁹ Mepïsyï pungköchan cho kewitanïn kïrïnta, nya kïnyorï chane ghöyityö nyo kötötyanïn.

¹⁰ Nya kïchïnchini ngeset pö ma chane. Nya kewirchï chane wölo le pïrïm akïtïpï wöloni kokay!

¹¹ Mepïsyï kichïmpisï kïmöngisyö nya kïnyorï rïmï ghöyityö lawel!

¹² Onkïtön, we ECHOTYON lö, isöröpunenyi cho kïpïröy aigh man ompö chopot.

¹³ Sölinyi pipö man nyoman akïmöngöy chane wöloni imitenyi. Tum pö Daudi.