TUMWÖY 139 - PIPÏLIA

¹ Kesyakaninyi, we ECHOTYON, akinkïtwaninyi.

² Pköchininyi kïgh anka tïkwïl nyo oghan, ainkïtönyi kinonutköchan ompö wölo low.

³ Isïwïyaninyi ato opöghisïyan anta ato omungan, inkïtönyi ighisyewutköchan löwïr.

⁴ Pköchininyi ngölyon anka tïkwïl nyo omwoghan kïtomö angalanan, we ECHOTYON.

⁵ Imitenyi iwitanïn wop tïkwïl, ikörtonaninyi ompö owesyengu.

⁶ Pö töngönchin chïreryengu ompö ani, wow tya, melö pköchinanïn.

⁷ Owetan onö atolowitwan nko nyi? Anta orïpchinan onö wölo memitenyi?

⁸ Ato apusan wölnö le yïm, imitenyi wölini. Ato oröytan wölnö le ngwen, imitenyi wölini tïkwïl!

⁹ Ato opilchan wölini pusuno asis anta owö amang wölnö röytoy asis,

¹⁰ imitenyi wöloni tïkwïl intöghoghwanïn, owesyengu nyo komönanïn.

¹¹ Ntökamwaghan lö, “Nya kulumanïn tuwïn, anta waghaka löpoyïn nyo kewitanïn kïlïkwï nangat,”

¹² wölo melö wïngeninyi tuwïn kïgh, lïwu nangatï ompö nyi le pöghet, karkegh tuwïn nko löpoyïn ompö nyi.

¹³ Kighanyi mïkulöwunyan, ainomnyaninyi ompö muyeto yonyu.

¹⁴ Osölinyi, ompöwölo kighaninyi ompö töngönchin nyo pö wow. Pö ighisyewutköku töngönchin, onkïtön löwïr ompö mïkulöwunyan.

¹⁵ Otini kikigh koyechan akenomnyö lasiny ompö muyeto yonyan, kinkïtönyi lö omitan wöloni onöröy ompö sison.

¹⁶ Kisïwaninyi kïtomö kenomnyanïn. Kikiranyi kitapungu osiswechan löwïr kïtomö kïpusï nyo le ompö akonga ompö choni!

¹⁷ Wechï awes kenkïtï kinonutköku, we Tororöt, chang chane lö ne nya!

¹⁸ Ntolan oyitöy, kötöchongitu kïtïl ngayam. Nyini kachïkanan, kïtomitan nko nyi.

¹⁹ Heywey Tororöt, mepar sonye mwokïyis! Wechï kötomökan lö töpïstanïn pich cho le rïmï!

²⁰ Ngöloneninyi chane nyo gha, akuswom kaynatengu ompö kinyarat.

²¹ Oreyan pich cho reyinyi asösan tya chane cho penyöy ngaleku!

²² Oreyan chane ompö mïkulöwunyan kïmïkul, oyitan chane lö pungköchan.

²³ Syachante, we Tororöt, ainkïtï mïkulöwunyan, tyamante ainkïtï kinonutköchan,

²⁴ atenkïtunö ato mi ghöyityö orinyan, intöghoghwante arïp or nyo pö kokay. Ompö kintöghoghinto tumï. Tum pö Daudi.