TUMWÖY 135 - PIPÏLIA

¹ Asala ECHOTYON! Asala kaynata ECHOTYON. Osölisyenö, cho ochï mötworichi,

² cho oghyongo Kö pö ECHOTYON, körköruto Tororötïncha.

³ Asala ECHOTYON, ompöwölo karam, otumchinö kaynatenyi, ompöwölo tïng nyinte pöropchö.

⁴ Kikïlchï kegh ECHOTYON Yakopo, kilïkwï pipö Israel mïlatenyi.

⁵ Ompöwölo onkïtön lö wow ECHOTYONtencha, kïtïl tororötin walaka löwïr.

⁶ Ighöy ECHOTYON kïgh anka tïkwïl nyo kömököy, ompö yïm nko ngwïny, ompö nanamtin nko ompö pögh ori.

⁷ Ipunö poltoy söremwok pö ngwïny akwigh rop nko kiryal akïkutuna yomat töpotenyi.

⁸ Kipara koro Misri poretay löwïr cho pö pich nko cho pö kyak.

⁹ Kigha kwenungu, kiporunöt nko töngönchin, we Misri atökuchop kong Parao nko mötworichi löwïr.

¹⁰ Kipar punton cho chang akïpar pöytoghï cho owesöch:

¹¹ Sion pöytoghinto pipö Amori nko Ok pöytoghinto Pasyan, nko pöytoghi Kanan löwïr.

¹² Kutötö korengwa kïlïkwï mïlan ompö pipö Israel.

¹³ Töpo kaynatengu kokay, we ECHOTYON, nonöy pïnwöy löwïr salatengu.

¹⁴ Rwokyini ECHOTYON pikachi ompö man, syonchini nyinte mötworichi.

¹⁵ Kikigha tororötino pipö punton silpa nko koltin, kikigha chane ewuno pich.

¹⁶ Tïngeto kutïw, wölo melö ngölonöy tïng konyïn, wölo melö rosïtoy.

¹⁷ Tïngeto yitïn, wölo melö lïmöy, melö muköy ompö ntökumuny.

¹⁸ Ikany kïkarkegh pïchoni löwïr nko körkeyïntinechoni, nko anka tïkwïl nyo ghönöy chane!

¹⁹ Asala ECHOTYON cho ochï pipö Israel, asala nyinte kö pö Aron!

²⁰ Asala ECHOTYON kö pö Lawi asala nyinte cho okonyïtöy!

²¹ Asala ECHOTYON nyo möngöy Sayon* nyinte nyo mi Yerusalem. Asala ECHOTYON!