TUMWÖY 132 - PIPÏLIA

¹ Mewutyeghö Daudi, we ECHOTYON, ompö kömpölelutkachi löwïr cho kinyorï.

² Inan kïgh nyo kiyomisunyi nyinte, we ECHOTYON, le wölo kiwolwolunyi nyinte, we Kimuktoghin pö Yakopo lö,

³ “Mowetanye konyu anta orï pöröyunyu,

⁴ momukanye ntö orï anta otönkör

⁵ ntökïtenö oyörunyi wölo imungo, we ECHOTYON, kö pö Kimuktoghin pö Yakopo!”

⁶ Kikïlïmacha ngala Santuku Muma* ompö Eprata kenyorchicha wuw pö Yearim.

⁷ Kelecha, “Kepe Kö pö ECHOTYON, kekïtïngenö tawu ngacharunyi.”

⁸ Nyonö Kongu, we ECHOTYON, nko Santuku Muma nyo le macheyto paytaghtangu, atemöngisyenö kokay.

⁹ Nya kelokyï tïsiku man, akuteghyö piköku ompö ngörekyö!

¹⁰ Metagh pöytoghin nyo kikïkïl, akwompö Daudi mötworintengu.

¹¹ Kyamanyi muma nko Daudi, muma nyo melö iyodonyi lö, “Oghan werïngu akonga kïlïku pöytoghin nyo köchini ngacharungu.

¹² Ato rip werköku mumenyan nko kirurutköchan cho onetan chane, kïlïku werkökwa tïkwïl pöytoghï cho köchini ngacharungu.”

¹³ Kakïl ECHOTYON Sayon,* akwigh kïlïkwï möngenyi.

¹⁴ Akïlö, “Anyï wölo omungenan kokay amöchan amang yete.

¹⁵ Operuran kanasyantanoni nyoman, opöghonan omisyö mey cho möngöy orinyi.

¹⁶ Olokyinan tïsichi sörunöt, tumöy pikachi akuteghyö ompö ngörekyö.

¹⁷ Ongopchinan paytagh nyakana ara Daudi oghan kïlanenyu kuletöy kïnöghöy le kitömöwon.

¹⁸ Olokyinan pungkachi arasï, wölo letöy tagh paytaghtanyi.” Tum pö saghat ompö rutogh pö Yerusalem. Tum pö Daudi.